Nagaland CEO-i tribal hoho tem den NERP atema senden amen

Dimapur, April 5 (TYO) : Nagaland Chief Electoral Officer, Sanjay Kumar-i April 4, 2016 nü tribal hoho ajak den National Electoral Roll Purification (NERP) 2016 programme aser Systematic Voters Education and Electoral Participation onüktem atema senden ka ayongzüka amen.
Iba senden ya Hotel Japfü nung agi aser Sanjay Kumar-i tesentepertem dang nungi electoral roll merüktettsü atema tebilembatem lemsatepa olemteptsü ayongzük.
Electoral roll tiptema meyanglu tashi clean election magitettsü. Naga loklitiba nung tribal hoho temji tongti teloktem lir, anungji electoral roll nung timtem alibatem agientsü atema nenoki tongti shilem agitsüla, ta paisa ayongzük.
Senden nung APO tir, Dr. Vilhousa Seleyi-i ashiba agi, tang election agiba inyakyim ya kanga tejen aser iba inyakyim ajanga ochimashi inyaktsü ajungmesor, anungji osettsüset tajungtem amshia inyakyim melenshi nüngdak.
Bangdak department-i electoral roll nung nisung ka tenüng aiben züluoka aliba reprangshimtsüla aser ibaji talisa jila balala nung sorkar mapa inyakertem tenüng reprangtsüla, ta retd IAS officer aser ACAUT consultative züngsem, Khekiye K. Sema-ia tebilemba ka lemsatep.
Election mapang kin o kin tsüngda ken o, ozüng alema arua alir nem vote agütsüdaktsüba aser sorkar teyari angutsü mechi nung yimtsüng tia nung aliba tesemtem nung vote agütsür tenüng talila züluokba onüktem lir. Iba dak sendakba asoshi VDB aser Arogoi shilem tulu agitettsü, ta Khekiye K. Sema-isa shisem.
CPO tir, Kekhwengulo Leah-ia bangdak department dang aibelenertem merenshitsü ayongzük aser department-i NERP takok ngua inyaktettsü atema tilatiba jenjang tashi lua tesayuba agütsütsü ayongzük.
Iba senden nung Lotha Hoho, Rengma Hoho, Ao Senden nungi teshimtet lennirtem den tanga lennirtemi o jembi.