Nagaland Chamber Choir-i Asia Pacific Choir sentong nung silver angu

Dimapur, November 03 (TYO): Nagaland Chamber Choir (TNCC)-i 4buba Asia Pacific Choir Games & Grand Prix of the nation nung shilem agia liasü, aser iba sentong nung linük 17 nungi choir 74-i shilem agi; item rongnung India nungia choir 8 liasü.
October 21 nungi 28 nü tashi Colombo, Sri Lanka nung ayongzükba sentong nung India tenüng nung category ana- Gospel/Spiritual category aser Folklore Acapella category nung shilem agia liasü aser The Nagaland Chamber Choir-i category anaprongla nung Silver Medal nguogo.
Iba dak alia Nagaland Chamaber Choir-isa Golden Diplomas ngua 2021 küm 5buba Asia pacific champion competition nunga indangindanga shilem agitettsü.
Tetoktepba balala dak alia TNCC-i St Mary”s Church Colombo nung ayongzükba friendship concert nung shilem agi aser closing ceremony nung Latvia, Iran, Sri Lanka aser India nungi choir tem den külemi Festival Stage Choir nunga shilem agiogo.
TNCC coordinator, Dr Limawati Pongen-i sangdong ka ajanga, “India tenüng nungi TNCC-i shilem agitsüji nüma tangtettsü ka aser ajemalutsü ka liasü. Choir-i aika ajangshia tajangzük kaogo aser International jenjang nung asen state dang masü saka linük-a Choral Music nung ajungmesogo,” ta metetdaktsü.
Iba dak sendakba nung TNCC-i Directorate of Art & Culture ajanga Nagaland sorkari senotsü teyari agütsüba aser planning & coordination department ajanga NEC Shillong-ia yariba atema pelaba lemsatepba den külemi Arogotem, temeimertem aser kibong züngsemtemi sarasadema ajanga maneni nungitba atema pelaba lemsatep.