Nagaland Chief Minister-i asükhu lemsatep

Dimapur, Rongchii/April 12 (TYO): April 11, 2019 nü Military Hospital, Jakhama, Kohima nung Lt. Col. Dina Nath Chauhan asüba osang angazüka temulung mepelaba CM-i sangdong ka ajanga lemsatepogo.
Lt. Col. Dina Nath Chauhan-i linük asoshi taküm tepeyong bendanga agüja tenzüka aruogo. Pai Mokokchung, Nagaland (1961 nungi 1963) densema tesem balala nung tenzüka aruogo.
Lt.Col. Dina Nath Chauhan ya tasütait sepai ka liasü aser arishi küm 93 tashi kanga yakyaka aser kümküma liasü. Pai Nagaland meimba ya ajaki tejangja. Pai par jabaso Lt. Gen. Shokin Chauhan Ceasefire Monitoring Group mendenbuba asüdang 2018 küm pa den adentsü asoshi telemtetba agi. Pa asüba ya linük aser Nagaland asoshi takoksa lir.
Ni Asür, Lt. Col. Dina Nath Chauhan’er kinungertem den asükhu lemsateper aser iba takoksa aremtettsü asoshi Tsüngremi tashi agüjang ta sarasademtsür. Pa tanüla tesunep nung anisüngzükdakjang, ta CM-i lemsatepba, ketdangser sangdong ka ajanga metetdaktsü.