Nagaland Chief minister-i DoNER kilonser ajuru, DoNER-i NE mapatem atema e-portal ka lapokogo

By on Comments Off on Nagaland Chief minister-i DoNER kilonser ajuru, DoNER-i NE mapatem atema e-portal ka lapokogo

Nagaland Chief Minister, Wb. T.R. Zeliang-i Development of North Eastern Region (I/C), Prime Minister’s Office, Personnel, Public Grievances & Pensions, Department of Atomic Energy, Department of Space kilonser, Dr. Jitendra Singh ajurua jembiba noksa nung angur. New Delhi, September 17, 2015.
Nagaland Chief Minister, Wb. T.R. Zeliang-i Development of North Eastern Region (I/C), Prime Minister’s Office, Personnel, Public Grievances & Pensions, Department of Atomic Energy, Department of Space kilonser, Dr. Jitendra Singh ajurua jembiba noksa nung angur. New Delhi, September 17, 2015.

New Delhi, Sept.17: Nagaland Chief Minister, Shri T.R. Zeliang-i Brehostibar nü Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr Jitendra Singh ajurua Nagaland nung terenlok mapa inyaktsü nüngdaktem den külemi Naga yimten tia indang lemsatepa liasü.
Iba mapang T.R.Zeliangi DoNER ministry ajanga terenlok mapatem tenzüka inyakba asoshi pelaba metetdaktsü.
Ano, Northeast nung terenlok mapatem takok ngua inyaktsü asoshi Dr. Jitendra Singh-i hi-tech online e- Portal tasen ka lapokogo. Joko tang nungibo Non-Lapsable Central Pool of Resource (NLCPR) sentong kübok inyakba mapatem ajak iba online ajanga dang agütsütsü, reprangtsü aser inyaktsü.
Iba online lapokba sentong nung jembidang, Dr. Jitendra Singh-i center sorkar kübok aliba ministry tem rongnung terenlok mapa inyakbatem (projects) yanglua agütsütsü aser mapa küma inyaktsü asoshi hi-tech inyakyim lapokbaji DoNER mezüng asütsü, ta pelaba o ka metetdaktsü.
DoNER Ministry yagi Northeast region repranger asünungji state ti pronglai terenlok mapa inyaktsü sentong tapu balala yanglur agütsür, anungji tang online inyakyim lapoka inyakba agi mapa mapang shitak nung tenzüka inyaker renemtsü aser ochimashi mapatem nungia kümzüktsü, ta paisa metetdaktsü.
Dr. Jitendra Singh-i ashiba agi, DoNER Ministry ya linük nung tangar dang nungi tentet balaka lir aser ‘region’ nung ajemdaker tentetba ministrty-bo linük nung iba ya dang lir. Anungji, tang online inyakyim lapokba ajanga tanga ministry aser department-tem tatishitsü agi North Eastern State Governments kübok Planning department-tem aser tanga sendaktepa aliba ministry tem indanga tongtepratepa inyaktettsü. Iba ama inyakyim ajanga state sorkar-tem kübok department shingaia mapa inyaktsü memenutsü, kechiyong meinyakra computer ajanga nenshitsü.
Khenkhenbo state kar nung senotsü mashi ochimashi amshiba osang arur, anungji iba ama mapang tang lapokba online portal ajanga bushisündanga inyaktetsü. Iba inyakyim ajanga India sorkari North East nung yimsü tajungba süa otettsüsa nübortem nem lenmang lapoktsür asütsü.
Iba senden nung Secretary, DoNER, Dr R.Vijaykumar, Secretary DoPT, Sanjay Kothari, Economic Adviser DoNER aser Brohmo Choudhury nungertem dena liasü.

Nagaland Chief minister-i DoNER kilonser ajuru, DoNER-i NE mapatem atema e-portal ka lapokogo added by on
View all posts by nungsang →

You must be logged in to post a comment Login