Nagaland Chief Minister-i Wokha District Hospital semdang

Dimapur, Monupii/May 07 (TYO): Nagaland Chief Minister Neiphiu Rio-i May 7, 2020 nü District Hospital Wokha semdanga sorkar ketdangser, Lotha Hoho, Lotha Eloe Hoho aser Lotha Students’ Union den senden mena liasü.
Deputy Commissioner, Wokha indang conference hall nung senden amenba mapang sorkar department balala, district administration, police, doctor, nurse aser yokbang sür district aser state nung COVID-19 tashidak wara azüoktsü atema meranga inyakba asoshi Chief Minister-i tenüngsang agütsü.
Pai COVID-19 hospital shimteta aliba tesem semdangba sülen District Task Force ajanga iba tesem renemshia aliba nung temolung asüba lemsatep aser iba tashidak den raratsü asoshi tang tajungba renema lir aser ibai danga kecha agia masü saka lokti tentet ajunga lungjemer inyakba ajanga lir, ta ashi.
Civil society aser NGO teyaritep ajanga anempong takok ngua litetogo aser arogo balala aser tamangertemi iba ama mapang tanen makai sarasademba asoshi pelar, ta pai ashi.
COVID Cess nungi bendenba sen ka maparen ka nung dang indoktsü aser ibaji COVID-19 alitsü, kong asen state nung health care facility kar tajungba küma yanglushitsü, ta Rio-i jangjashitsü.
Wokha-Merapani arrtsü lapoka district nung nüngdakba osettsüset abentsü atema Lotha Hoho-i onük benok, kechiaser tesem anaprong ya Green Zone category nung dena lir, aser iba atema Chief Minister-i Deputy Commissioner, Wokha dang sentong tejangja yanglur tali asadangtsü atema Home Commissioner aser Chief Secretary, Nagaland nem agütsütsü totuyuba agütsü.
Lotha Hoho-isa Chief Minister den district hospital nung doctor peria maliba indang tebilemtsü lemsatep aser tang nüngdakba osettem, talisa X- Ray machine, Ventilators, cardiac monitors, Thermal scanners aser PPE tajung agüjang, ta ashi. CM-ia iba ken o tekeratiba nung sorkar jenjang nung inyakteptsü metetdaktsü.
Deputy Commissioner, Wokha, Orenthung Lotha, shiba senden nung mendenpuba liasü, pai Chief Minister den District Task Force, medical aser police temi maparen balala inyakba indang lemsatepa liasü.
Chief Minister meina Dy.C.M, Home aser R&B Minister Y. Patton, Minister, Rural Development Metsubo Jamir, Minister, Higher Education & Technical Education aser Tribal Affairs Temjen Imna Along, MLA Dr. Chumben Murry nungertem oa liasü.