Nagaland Chief Minister office indang website lapok Sorkar kübok department ajaki website lapoktsü tuyur

Dimapur, September 21 (TYO): Nübortem den tesentaktep tajungba ayutsü nükjidong nung Hombar anüngdang Nagaland Chief Minister, TR Zeliang-i pa indang office website sayaogo.
Iba website nung nübortemi Chief Minister-i shilem agiba noksatem angutsü aser nisung mashi kati reprangtsü akok.
Tanü sayaba website nungsa Chief Minister-i jembiba tongtipang onüktem aser ano tesüiba mapang Nagaland nung Chief minister tem indang temetettsütem angutsü.
Tanü Chief minister indang website ji Cabinet senden ka nung saya aser iba mapang e-governance onük benoka lemsatep aser department ajak nung tashishitsü melii inyaktsü atema olemtep.
Tiyazü nung itasen achirtem/taila mapa inyakertem, backdoor appointments amala noktangtsü atema department temi sorkar mapa inyakertem indang tenüng aser temetettsütem website nung sayutsü atema tanü telemtetba agi.
Iba denji külemi sorkari inyakba mapatem meteta lidaktsütsü atema department temi inyakba mapatongtem indang temetettsütem sayutsü.
Alima kanga kara aiba ainba putu den külemi liromedemtsü atema Information Technology & Communication department-i tongtipang shilem agir aser parnoki sorkari inyakba mapa indang osangtem sangdongba dang masü saka sorkar timi ketdang asütsü atema mapa inyaker.
Nagaland nung electronic inyakyim ajanga osangtsüsang aser services agütsütsü atema Department of IT & C-i State Data Centre aser State Portal tenzükogo.
Sorkari department ajak dang email, Internet, departmental websites aser electronic media nungertem ajanga sorkar sasep nung tongteprateptsü ayongzükogo aser Nagaland sorkar kübok lapokba website ajak State Data Centre ajanga anepalutsü shiogo.
Tanü Cabinet senden nung IT Cadre tentettsü mulunga agizük aser iba nung IT Technical Officers tem department balala nung IT den sendakba mapa nug yariteptsü atema mapa lemzüktsütsü.
Department ajaki parnok budget nung shilem 3 IT den sendakba mapa atema lemzüktsütsü aser iba senji Department of IT &C nung Head of Account kübok enoksemtsüla, ta Cabinet-isa telemtetba agi.
Tang nung Nagaland sorkar kübok department ajak departmental website ka ka lapoktsüla aser ibaji Nagaland State Data Centre ajanga anepalutsü. Department ajaki pei indang website nung Annual Report, RTI, Activities & Project status, Budget Outlay, Employee details, Photo Gallery, Feedback, Downloads, Contact details, amala enoksemtsüla, ta Cabinet senden nungsa telemtetba agia metetdaktsüogo.
Tanü Chief Minister Office indang website sayaba sentong nung Cabinet züngsemtem aden aser iba indang web address ji www.chiefministernagaland.in lir.