Nagaland Chief Minister’s Office ajanga oleplang agütsür

Kohima, Aami/June 14 (TYO): Aami/June 12-13, 2018 anogotem nung National aser local osangkakettem nung Nagaland Chief Minister, Neiphiu Rio-i Naga nunger aliba li longjemtsüji tamakoktsü, ta jembiba osang adokbatemji Chief Minister’s Office, Nagaland ajanga ashishir, ta tanü Media Cell, Chief Minister’s Office, Nagaland, Kohima-i sangdong ka ajanga metetdaktsü.
“Aami/June 12, 2018 nü Chief Minister leniba nung Nagaland state sorkar nungi MLA tem aser ketdangsertem teshimtet telok kati Union Home Minister, Rajnath Singh, pa indang office, North Block, Central Secretariat, New Delhi nung ajurua liasü, aser iba senden nung state dak sendakba onük aika nung o lemtepa liasü,” ta sangdong nung shia lir.
“Item onüktem rongnung tang tejembidak Naga yimtenren aser yimjung ken o densema jembi. Iba mapang nungji teshimtet telok dang yamai ashi- Naga nunger aliba litsü ajak longjemtsü onük nungji Naga nunger aliba kidanger state tem densema lir, anungji kidanger state temi tangatettep nung melung ka mesüra ibaji tamakoktsü ta metetdaktsü. Union Home Minister aser teshimtet telok na tsüngda iba onük jembi,” ta kasa sangdong ajanga metetdaktsü.
“Iba senden nung jembiba oji Chief Minister-i osangbenertem nem metetdaktsü. Anungji iba oji Chief Minister mesüra State sorkari jembiba ama mezüngshitsüla, kechiyong ken o jembiba nung State sorkarji direct party ka masü, mesüra India sorkar aser Naga yimtenren teloktem tsüngda tang ken o tejembidak nung shilem agir ka masü mali,” ta kasa sangdong ajangasa metetdaktsü.
“Tesüiba küm 21 tashi ken o jembia arudar, anungji Chief Minister-i Naga nungeri tekaratiba nung ajaki agizüktettsüsa yimtenren latetdaktsüner ta shiogo. Tang yimjung ken o tejembidak junga katettsü atema state sorkari lenmang lapoktsür ka ama shilem agir, aser tensa junga alitsü atema akokba ajak inyakdar,” ta Media Cell, Chief Minister’s Office sangdong ajangasa metetdaktsü.