Nagaland Chief Secretary-i Engineer tem ayongzük

Dimapur, September 15 (TYO) : September 15, 2015 nü Federation of Nagaland State Engineer’s Service Association (FONSESA)-i Engineer’s Day ayongzüka mungogo.

Iba sentong ya Engineer-in-Chief Conference Hall, NPWD Complex, Kohima nung agi aser tongti tesemdangerji Nagaland Chief Secretary, Pankaj Kumar IAS liasü.

Chief Secretary, Pankaj Kumar-i o jembidang ashiba agi, pa iba Engineer’s Day nung adenba atema kanga pelar kechiyong pa-a Engineer ka lir.

Engineer ka indang mapaji kanga tasak aser teinyaktsü den tebilemtsü khuret ulura lir. Mapatong tila mesüra tulu süaka mapa junga inyaktsübaji Engineer ka dak dang keta lir, ta Pankaj Kumar-i ashi.

Engineer temi mapang shitak nung pei teinyaktsü mapatong shisadangtsüla aser mapa tiptema inyaktsüla. Nagaland nung temulung lemtetba Engineer tem ama FONSESA züngsemtemi pei lemzükba mapa ajak jungjunga inyaktsü merangtsüla, ta Chief Secretary-isa ayongzük.

Tanü agiba sentong nung Retired Engineer, Lanu Toy aden aser FONSESA-i pa nem ‘senior most member’ tetushi agütsü. Tongti tesemdanger Pankaj Kumar-i Federation of Nagaland State Engineering Services Association (FONSESA)-i adokba ‘Engineering applications in our daily lives’ kaket sayatsü.

Küm shia India nung Engineers Day amunger aser iba ya Mokshagundam Visvesvarya tasoba anogo nung amunger. Mokshagundam ya 1860 küm taoba Kingdom of Mysore nung aso aser engineer tajung ka liasü, ta FONSESA tir, Er. R. Temsutemjen-i tanü anogomung teratet metetdaktsü.

Chief Engineer (T&G), Department of Power, Er. K. Miacheo-ia o tatsüka jembidang, “Engineers Day ya asenoki Nagaland nung alirtem atema bendanga agütsüshiba anogomung ka lir’ ta ashi.

Nagaland nung terenlok bener arutsü atema FONSESA züngsem ajaki pei pei lemzüka aliba mapa nung takok ngua inyaktsüla, ta paisa ayongzük.

Tanü agiba sentong nung mendenji FONSESA tatong tir, Er. Shikato Sema liasü aser Er. Limanaro, SE, NPWD-i anküp tepela o jembi.