Nagaland Chief Secretary Temjen Toy süogo

Dimapur, Aenjeti/January 28 (TYO): Nagaland Chief Secretary Talitemjen Toy mapang tatsüka cancer agi shiranga arur Brehostibar nikongdang Kohima nung par kidang asü. Pa arishi küm 57 tain liasü. Osang kar ajanga ashiba agi, taoba küm pa dak iba tashidak putetba sülen New York nung temang anepalua aru.

Pa tawa state-i meyipa shilang, saka yashi pa temang tamajungba akum aser January 28, 2021 nü Kohima nung asü.

Toy ya temesen cancer agi timtema liasü aser Delhi nung mozüki ka nung temang anepalua liasü. Pai kinungtsü, jabaso ana aser jala ana yutsür iba lima nungi pilaogo.

2018 küm March ita Nagaland Chief Secretary menden agizüksang Temjen Toy ya1989 batch IAS officer liasü.

2020 küm October ita pai “Taneptsü anguba mapang” ta Twitter nung zülu, aser ibaji pai tweet asüba tatembangba liasü. Pa asüba osang angashia state kinük ajungalen nungi sangdong balala nung asükhu lemsatepba mapang lir.

Nagaland Chief Minister Neiphiu Rio-i tweet ka nung, “Nagaland indang Chief Secretary @temjentoy asüba asoshi ni kanga jashir. Pa ya ajemalur, ochishir aser bendanga agütsür sorkar tenzüker ka liasü. Pa asüba ya Nagaland sorkar aser talisa Naga nunger ajunga asoshi takoksa tulu. Par kinunger den asükhu lemsateper. Pa tanüla tesunep nung anisüngzükjangma,” ta zülutsü.

“Asenok den Shri @temjentoy mali ta meteta kangasa jashir aser aoksar. Asenok asoshi tetangshi administrator aser meimchir tajung ka samaogo! Pa tanüla tesunep nung anisüngzükjangma. Iba mangyim tejashi koktettsü asoshi Tsüngremi par kibong nem tashi agüjang,” ta Raj Bhavan Kohima ajanga tweet asü.

“Pa ya nisung tajung den tesüngmangtsü sempet aketba nübu ka liasü. Pa ajungbena asüba ya asen Nagaland administration asoshi takoksa tuli. Mangyimer kibong nem tashi agüjang aser asür tanüla tesunep nung anisüngzükjang ta ni sarasademtür,” ta taoba Nagaland governor, PB Acharya-i ashi.

BJP National Spokesperson aser Mizoram state in-charge Mmhonlumo Kikon-ia tweet ka nung, “Temjen Toy asüba ajanga Naga nunger atema prangshia aliba petinu ka samaogo,” ta zülua liasü.

Nagaland MP Tokheho Yepthomi-ia Temjen Toy asüba mangyima lemsatep. “Nagaland Chief Secretary Temjen Toy asüba ajanga ni kanga jashir. Pa ya teindang nisung ka liasü, shiba dak ochi aser ajemalu molungsentsü liasü. Nagaland asoshi nisung tajung ka samaogo. Pa tanüla tesunep nung anisüngzükjama,” ta Tokheho-i tweet asü.

Nagaland indang Deputy Chief Minister aser BLP lenir Y Patton-ia sangdong ka nung, Temjen Toy IAS, Chief Secretary, Nagaland mapang tatsüka shiranga arur asüba osang angazüka aoksar aser sasar, ta lemsatep.

Toy ya 1989 küm UPSC tatidang ajanga IAS cader angu aser jenjang balala nung mapa ajetba administrator ka ama tenzüka arur Chief Secretary jenjang tongtet.

State nung administrative tsütsü pai aisü nung temelenshi bener arutsü aser iba atema state sorkari teti pa tenüng tetshitsü. Pa asüba ajanga state nung administrator metsü tajungtiba ka samaogo aser iba tawa asüngtsü kanga tasak asütsü, ta Patton-i ashi.

Ozü kibong aser state BJP legislature tem tenüng nung mangyimer kibong den asükhu lemsateper, ta Dy. CM ajanga ashi.

Nagaland Opposition lenir T.R. Zeliang-ia sangdong ka nung, Nagaland Chief Secretary, Temjen Toy asüba osang angashia ni aoksar aser temolung shiranger, ta ashi. Pa asüba ya Naga nunger aser talisa State sorkar asoshi takoksa tulu alitsü, koba pai tematiba nung nendaka aser bendanga agütsür tenzüka aru. Pa ya shisa taka bureaucrat ka liasü, shibai state sorkar kübok menden balala nung pa nem mapa nungloktsüba nung tamakok majurui inyaka liasü, ta T.R. Zeliang-i ashi.

Tembar tajung aser adianu ka ama pa den jangratema lia aruogo. Ni Chief Minister inyakba mapang pa Principal Secretary to the Chief Minister liasü aser iba mapang pai o bulua mejembiaka kanga tekumdang, tesüngjem aser mapa nung bendanga agütsür inyakba nguogo, ta pai ashi.

Tembar tajung aser adianu ka ama pa den jangratema lia aruogo. Ni Chief Minister inyakba mapang

pa Principal Secretary to the Chief Minister liasü aser iba mapang pai o bulua mejembiaka kanga tekumdang, tesüngjem aser mapa nung bendanga agütsür inyakba nguogo, ta pai ashi.

Asür Temjem Toy-i nübur asoshi tajungtiba inyakogo aser state aser yangi aliba nübur asoshi pai shilem tajung agiba teti bilemtettsü. Tang mangyim jashi mapang Tsüngremi mangyimer kibong nem anisüngzük agüjang ta sarasademtsür, ta T.R. Zeliangisa ashi.

Tanü nikongdang Temjen Toy, IAS, Chief Secretary, Government of Nagaland asüba osang angazüka Nationalist Democratic Progressive Party-i mang ayimer, ta NDPP tir, Chingwang Konyak-i sangdong

ka ajanga ashi.

Nüburtemi kanga jangja metetba aser tushia amshiba kibong ka nungi pa yimyaliru nung tatishitsü tajung jenti keta liasü.

Tensa tamajung süaka pai kodanga ola madok aser lenir ka dak alitsü sempet ajunga pa dak keta liasü.

Pa den külemi inyaktsü maongka angur ajungai pa meim, temolung süa agizük, saklok aser pa dak ranglok; pai ketdangsüba nüburtemi pa atema tajung dang ashitsü lir, ta sangdong ajanga ashi.

Pa kübok tenzüker dang pei mapa tajungtiba nung inyaktsü atema pai teti ajungshia lenmang sayua aser shisatsü agüja aru. Tongtipangsa pa ya Tsüngrem tsüboba takum ka liasü aser Tulusang Tsüngrem aser nüburtem matsüngdang majung ta bilemba mapa aser inyakyim nungi pa pila ali, ta NDPP ajanga ashi.

Bureaucrat tem rongnung pa ya khuret kokteter ka ama züngshi, kechiaser pa adenba kijaia mangatetep adoka alirtem tsüngta tangatetep kati arua pai kanga kumdanga kazüka yokba nung anidak, aser state sorkara political party kobai anidir aniaka pa nungi jenjang balala nung ajangzüka liasü.

Pa asüba ajanga Nagaland atema sentilong ka, ketdangsür ka samaogo aser pa ama asenoki aiben mangutsü. Nisung kija shiai aginüba yimya ajunga pa dak liasü aser lanurtem asoshi nükrangdong ka liasü. Kü den külemi NDPP nung sendaka alir ajaki mangyimer den asükhu lemsateper aser asür tanüla teti tatem maka tesunep nung anisüngzükjangma, ta NDPP tir kasa sangdong ajanga ashi.

Anojungi state nung senior most bureaucrat asüba asoshi Dimapur Naga Students’ Union-i mang ayimer, ta DNSU Media Cell sangdong ka ajanga ashi. Asür Temjen Toy, IAS, Chief Secretary ajanga lenla ajak nung akok tashi lokti asoshi shilem agiba atema DNSU-i tematiba nung akhum agütsür.

Nagaland state asoshi tetemjen tebu, jabaso, ketdangser aser senso tajung ka samaogo.

Pa tanüla tesunep nung anisüngzükjang aser mangyimer kibong nem tesuneptsüba agüjang ta sarasademtsür, ta DNSU sangdong ajanga ashi.