Nagaland CM & Angh nati Diwali salem abener

Dimapur, October 29 (TYO) : Nagaland Chief Minister, T.R Zeliang-i sangdong ka ajanga Nagaland nung aliba telok ajak den tesangwa benjung ‘Diwali’ salem osang lemsatep.
Tajungi temenen madak takok anguba tenüng nung Diwali amunger aser iba benjung amungba ajanga ochi aser tejungnü tangatetba agi teti takok angutsü ta sayur. Anungji, tesangwa indang benjung amungba asoshi asenoki nüma tanga bilemtsüla, ta Media cell Chief Minister’s Office, Nagaland-i sangdong nung metetdaktsü.
Iba benjung ajanga nisung ajak dangi tepela, yimjung aser temoatsü bener arutsütsü imlar, ta T.R Zeliang-isa ashi.
Nagaland Angh, P.B. Acharya-ia sangdong ka ajanga Diwali  salem lemsatepogo.
Iba ya Hindu nunger tamangba benjung tongtipang ka lir aser iba benjung ajanga tajung-i temenen madak takok anguba sayur. Lord Rama-i temenen chuba Ravana madak takok ngur par Ayodhya yimlii meyipa aruba atema benjungteper, ta Angh Acharya-i sangdong nung shia lir.
Iba benjung nung asenok ajak külemi longjemdi aser asen loktiliba nungi ochimashi aser temeten manguba inyakyim samadaktsüdi. Diwali ajanga state nung telok balala tsüngda yimjung, telongjem aser teputep bener arujang ta moatsür. Asenoki asen Nagaland nung yimjung asr azükaru arudaktsütsü, ta Angh-isa ayongzük.