Nagaland CM aser NSF-i Imphal nung atalokba aitsür

Dimapur, December 18 (TYO): Manipur nung tenemtsünglen amenoka aliba teloktem aser nisungtemi amokmerenba sülen Imphal nung Naga nunger noklang aika pei pei yimtsüngi moudaktsüi nokdanga lir, aser Naga nunger amenba garitem aika len tom nung soter aser mi senoka rongdoktsüba osang angazüker, ta Nagaland Chief Minister, T.R Zeliang-i Manipur Chief Minister, Ibobi Singh dang shidi ka ajanga metetdaktsüogo.
Imphal nung Naga nunger taküm aser kiojentem kümzüka ayutsü atema state sorkari mapa inyaktsü mepishir, ta paisa Ibobi Singh ashi.
Nagaland sorkari Nagaland nung aliba aser state adena senzüba Meitei nunger ajak kümzüka ayutsü atema mapa tenzükogo, ta T.R Zeliang-isa shidi nung shia lir.
Ano, Naga Students’ Federation (NSF)-ia sangdong ka nung, Manipur sorkari teyari agüja Imphal nung Meitei nungertemi Naga nunger dak taochi makai mapa inyakba kukua aitsür ta metetdaktsüogo.
Naga nungertemi ozüng akhümtsübua aser timtesü agi dang onok temeten atema mapa inyaker, saka Meitei nungeri Naga nunger ainlen senzürtem sota ayuba, tenlaki sensamasatsüba aser garitem rongdoktsüba inyakyimtem magizüker, ta NSF President, Subenthung Kithan aser General Secretary, Boveio Poukai Duo nati sangdong nung shia lir.
Manipur nung Naga nunger taküm ka danga samara, iba tebilemtsüji Manipur sorkar khuret asütsü. Anungji Ibobi Singh-i Manipur nung Naga nungertem reshikangshiba anentsüla, ta NSF-isa metetdaktsü.