Nagaland CM-i Ato Kilonser Modi den ajurutep

Nagaland Chief Minister, Wb. T.R. Zeliang aser Kilo kilonser  Wb. Y. Patton nati tanü Honibar  nü ato kilonser Wb. Narendra Modi,  New Delhi nung ajurua  jembiba noksa nung amonger (August 08, 2015.)

Dimapur, August 8 (TYO) : Honibarnü Nagaland Chief Minister, TR Zeliang-i New Delhi nung India Ato Kilonser Narendra Modi den ajurutep, ta Media cell, CMO-i sangdong ka nung metetdaktsü.
Iba senden nung TR Zeliang-i Modi dang, sorkar atema tiyongtsü nung o jembitsür Ravi-i teinyaktsü sentong merenemdang mezüng yimten telok aser lokti tentet ajak den asüngdangya asütsüla, ta ashi.
Modi-ia Zeliang dang iba inyakyim ajanga aser ano yimjung tensa arudaktsüba ajanga pai North-Eastern Region renlokdaktsütsü, ta ashi.
Hokolbarnü interlocutor Ravi den ajurutepa senden agidang pa August 15 sülen Nagaland-i arutsü aser iba mapang arrtsü indang onük atema asüngdangyatsü aser iba sülen jiang ajaki mulungtepa telemtetba ka agitsü ta ashi, ta TR Zeliang-i ashi.
Tanü Nagaland CM TR Zeliang aser Ato Kilonser Modi na ajurutepa senden agidang National Security Advisor Ajit Doval aser Nagaland Home Minister Y Patton na dena liasü.