Nagaland CM-i Burma Campaign Society tanishir den ajurutep

Dimapur, May 24 (TYO): Bodbarnü Nagaland Chief Minister Dr Shurhozelie Liezietsu-i Burma Campaign Society nung Chairperson, Wt. Akiko McDonald den ajurutep aser tena sensaksemdang, Naga nunger dena British aser Japanese nunger tsüngda yimjung yanglutsü indang tebilembatem lemsatep.
Burma Campaign Society (BCS) indang alizüngji, Second World War mapang Britain aser Japan tsüngda raraba aser iba dak sendakba ken o tem adoka aliba angatetteptsü aser putepshitsü atema lir.
1983 nungi asür Masao Hirakubo OBE-i British aser Japanese sepaitem tsünga taitokteper putepa alitsü atema mapa inyaktsü tenzük. Linük ana nungi taoba mapang sepai alirtemi Burma Campaign Fellowship Group tenzük. Linük ana tsüngda tesentaktep tajungba yanglutsü atema parnoki UK, Japan, Burma, aser India nung külem ‘memorial service’ tem ayongzüka agir, ta tanü Media Cell, Chief Minister’s Office, Nagaland sangdong ka nung metetdaktsü.
“Ni Lieutenant General Sato taküm otsü kanga sapua aküm, kechiyong kübo Taiji Urayama ji 31st Division nung lieutenant ka liasü. Iba division ya General Sato lenisüba kübok liasü” ta küm ishika tejaklen Wt. Akiko McDonald-i Japan Times nung ocet ka züludang ashi.
“Burma Campaign Society nung taoba chairman Hirakubo jia 31st Division nung lieutenant ka liasü aser ni amanger General Sato-i rara mapang telemtetba agibatem ajanga kübo aser Hirakubo na taküm kümzük” ta laisa ashi.
“Iba jagi ni Lieutenant General Kotoku Sato-i inyakba mapatem ajanga ajungmeso aser ibaji dang masü saka pa indang taküm aser yimyatsüya ajanga ni ajungemeso. General Sato-i Kohima rara nung 31st Division nungi 15th Army anientsü telemtetba agiba atema nisungtemi pa mezüngmeshi aser pa tekolok meshidak ta aitsü” ta Wt. Akiko-isa metetdaktsü.
Iba rara nung Lt. General Sato-i pa indang General tetuyuba tashi manga aser pa kübok aliba sepaitem rara nungi anien. Parnok yatzüra masütsü, tashidak tamajung nungi jenbutsü aser yiruba zübotem anepalutsü atema Sato-i sepaitem anien. Pai sepaitem anienba sülen British-Indian army-i Naga nunger litsü meyipa agi aser iba jagi Imphal operation anen, ta laisa shisem.
“1998 küm Japanese Emperor-i UK semdangba mapang, taoba British sepaitemi Japan anema lungkak aitba sentongtem agi, idangji kü temulung nung tejembiba ka aru. Iba kasa mapang ka nung, ni Hirakubo den ajurutep. Idangji pa Burma Campaign Society (BCS) nung chairman teinyakdak liasü. Iba telok ya Burma nung rarar Japanese aser British sepaitem tsüngda tai tokteptsü aser putepshitsü atema mapa inyaktsü asoshi tenzükba liasü. 2008 nung Hirakubo asüba sülen ni BCS nung chairwoman aküm” ta Wt. Akiko-isa ashi.
“Tsükchir tejentem tsüngda tesentaktep tajungba kümdaktsütsü atema ni BCS nung inyaktsü tenzük. Ni küm 20 dak tali UK nung alir aser ni küm 28 tashi British nunger ka den kibong kümer, liyonga arudar. Iba ya ajanga ni telok anaprong indang tebilembatem angateter” ta laisa metetdaktsü.