Nagaland CM-i DoNER Minister den ajurutep

New Delhi, Metsüremi (March) 20 (Agenceis): Nagaland Chief Minister Neiphiu Rio-i Union Minister of State (Independent Charge) of the Ministry of Development of North-Eastern Region (DoNER), MoS PMO, Personnel, Public Grievances & Pensions, Atomic Energy and Space, Jitendra Singh den ajurutep.
Iba mapang Rio-i Jitendra den Nagaland dak sendakba onüktem lemsatep aser Government Medical College ka tentettsüba den Kohima nung tayimtsü anendak ka yanglutsü takhangba agütsü.
Rio-isa Dr Jitendra dang Minister in-charge Department of Personnel & Training (DoPT) ka ama pai Nagaland nungi IAS ketdangser kar state-i meyipa yoktsü atema tetuyuba agüjang ta mepishia ashi.
Nagaland chief minister-isa state nung security aser yimtenren tensa indang osang lemsatep aser iba nung Naga telungpur telok kari ashiba onüktem lemsatep.
Nagaland nung Medical College ka lapoktsü atema pai Union Health Ministry dangi benogo kechiyong Nagaland nung Medical College ka danga mali ta Dr Jitendra-i langzü.
Iba onük atema pai Rio dang Union Health Ministry den jembitsü aser parnoki linük nung Medical College tem aika lapoktsü lemzüktsüdang Nagaland nunga college ka lemzüktsütsü imlar ta ashi.
Kohima nung airport atema ashidang, Airport Authority of India aser Ministry of Civil Aviation-i iba atema mapa teinyakdak lir saka tetsükdaktsü kar ajurua lir aser ibaji state sorkari yaritepa inyaktsüla, ta Dr Jitendra-isa ashi.
Nagaland nung State Cadre IAS ketdangsertem lemzüktsü koka lir aser iba atema state nung senior officer kati DoPT den mapa inyakdakjang ta paisa Chief Minister Rio dang ashi.
Prime Minister Narendra Modi-i Nagaland nung terenlok bener arunür aser kasa mapang nung telungpur khuret ya koktettsü atema telemtetba ka aginür, ta Dr Jitendra-isa metetdaktsü.
Modi sorkar aser Ministry of Home Affairs-i renemba framework ajanga nübortemi aginüba ama telemtetba ka agitsü imlar, ta paisa shisem.