Nagaland CM-i linük tenzükertem dang jangjashitsür

Dimapur, August 27 (TYO) : Naga nunger linük tenzüker telok kari August 27, 2016 nü adokba osangkaket kar nung Chief Minister aitsüba atema tanü Media Cell, Chief Minister’s Office, Nagaland-i sangdong ka nung onük kar jangjashitsüogo.
August 3, 2015 Framework Agreement ji pa mesüra state sorkar ket nung mali saka telok ana tsüngda olemtepba nung Naga nunger taginüba ama telemtetba ka agitsü atema tamang yudi ta Chief Minister-i aiben metetdaktsüogo, ta Media Cell sangdong nung shia lir.
India sorkar aser NSCN (IM) tsüngda Naga yimten tebilemtsü atema olemtep ya 1997 küm tenzük aser tang joko 19 ajunger. India sorkar aser NSCN teloktem tsüngda kodangsa Ceasefire Agreement agitepdir, Nagaland state nung sorkartemi yimjung maparen nung yaritepa aru aser yamaji tanga sorkari kasa tangatetba nung yariteper. Ajisüaka, nisung karibo yimjung olemtep ya tang teinyakdak Chief Minister indang kümsük nungang tenzüka inyaker ama bilemba ajiteter, ta parnokisa ashi.
Media Cell sangdong nungsa, Naga nungeri teti atema yimjung aginür aser ibaji Naga nunger ajak telatetba ka ajanga dang angutsü ta Chief Minister-i meteta lir. Tatembang telemtetba ka agiba nung Naga nunger kolen lidir liaka, ajak indang shilem lir. T.R Zeliang ji kidanger süa aliba state tem atema masü saka Nagaland indang Chief minister lir, ajisüaka iba tebilemtsü mekoktet tashi pai Naga nunger ajak atema maneni jembitsü.
Mapang shia Chief Minister-i Interlocutor dang Naga Political Group tem tsüngda mangatettep alibatem angatetteptsü atema parnok telok shia den ajuruteptsü atema mepishia arur. March 9, 2016 nü Chumukedima Consultative senden nung Chief minister-i telok ajak dang Interlocutor den ajuruteptsü mulungra pai yariteptsü ta metetdakja liasü, ta Media Cell, CMO-isa ashi.
KVK Jalukie nung sentongji ICAR ajanga ayongzüka agi aser iba ya Central Government Institute ka lir. Iba reju lapokdang Union Minister-i tia tajung aser azükaru lidaktsütsü atema milen ka tsükloktsü aser narikol ka jaksa. Iba sentong nung Chief Minister aser state sorkar kecha shilem maliasü.
Jalukie nung Veterinary College lapokba sentong nung nisung meyirjang aika aden aser iba mapang State Chaplain Rev Kuzeirang Thou-i temoatsü meshia sarasadem. Ano, Chief Minister-i Farmers’ Training School lung azünga yutsüdang Jalukie Town Baptist Church Pastor, Mongzeu-i temoatsü meshia sarasadem. Anungji, Chief Minister-i Hindu mesüra Heraka külemküjaba yimya amshi ta asübaji tiyazü aser kuli kecha mali, ta sangdong nungsa metetdaktsü.