Nagaland CM Neiphiu Rio-i Mokokchung semdang

Mokokchung, May 7 (TYO): Nagaland Chief Minister Neiphiu Rio aser par külem yimsüsür kari May 7 nü Mokokchung Covid19 hospital semdanga liasü aser iba sülenji Mokokchung D.C Bungalow nung Ao Senden-i anir lokti tentet balala den senden ka amen.
Iba senden nung Rio-i jembidang, Mokokchung district nung Covid19 dak sentakba renemkonemba maparen nung tenük asüngba ashi aser nüburtem kanga junga azüoka bener aoba asoshi district administration-i anir yakbangsürtem aser Ao Sendeni anir mulungtet telok ajak dang pelaba lemsatep.
Tanü tashi Tsüngrem taochi ajanga Nagaland bo Covid19 positive kata putetba mali, iba tashitak anema tanü tashi takok ngua noktangtetba ya tongtibangsa asenok amalitepa lungjemer raraba ajanga lir, ta ashi. Lungjemer inyakba nungji jangratemtsü lir aser ano maneni iba amai odaktsünür, ta paisa mepishia ashi.
Lockdown yagi alima rongsenketzüng kanga mejungi kümdaktsüogo, anungji, state aika nung joko mapa karbo salaja Red, Orange aser Green ta lemsar maparen balala inyak tenzükogo. Asenoka rongsenketzüng aiba mapa karbo salaogo, saka lokti nungi pilaba aser teinyaktsü standard operating procedure (SOP) kechisa lir, itemji kanga junga anitaktsüla, ta ashi.
Lockdown mapang pei alidaki moteti alir pei kidangi aotsü Inter-district jajatsü tanü nungi melar aser ibaji May 9, 2020 tashi aotsü. Iba sülenji Inter-state tenzüktsü saka iba mapa atemaji koyimi inyaktsü aser koma renema atatsü ta asübaji tang teinyakdakdak lir, kechiyong yangi lendong tulu sentaka lir, ta paisa shisem.
Mapang talangka politics jembia aruogo aser Naga political solution atemaji maneni jembia odar, saka tang yabo politics masü rongsenketzüng terenlok indang jembitsü nungdak adoker, ta ashi. Naga nunger joko pei sasa tebok sünga alitsü asoshi inyaktsü nungdaker ta apijemogo, anungji, aluyimba (agri & allied) tsütsü temulung agütsütsü asoshi luden ka shimogo, ta paisa metetdaktsü. “Asenok joko ali dangi meyiptsüla aser pei sasa noktakteta alitsü merangtsüla”, ta paisa shisem.
Joko lokti balala nung lenirtemi mapa meranga inyaker sen ahtsü aser chiajema alitsü asoshi ajungshitsüla, kechiyong Laishiba nunga mapa meinyakerbo techiyungdaktsü ta shia lir, ta ashi. Nüburtemi ak metsüba, an metsüba, nashi metsüba mapatem nung temulung agütsüdaktsünür aser iba nungjia asenok perir ang tangar nema yoktettsüsa inyaktsüla, ta paisa ashi.
2015 August 3 nung Framework Agreement renemer Naga yimden tebilemtsü jembia arur külen 2019 October 31 nü tembangogo, aji saka, tanü tashi telemtetba magiteter, anungji, iba nung ya tebilemtsü lir, ta paisa khuret ka lemsatep.
“Nagaland rongsenketzüng tiaji teimla makai kümogo, asenok rongsen tarulen maka, asen lokti aser rongsenketzüng ya itasen dak dang metaloka lir, asenoki züsentetba kecha maka, anungji, asenok kanga kümdangtsüla, tangari arua asen lima meyanglutsütsü, anungji, kati ka anemtepba ya anentsüla aser mejangba nungi saaktsüla”, ta paisa tayongzükba ka agütsü.
Tanü iba senden nung Deputy Chief Minister Y. Patton, minister Metsübo Jamir, minister Temjen Imna Along, Mokokchung D.C Limawabang Jamir, Mokokchung S.P Vishal IPS, Ao Senden tir Chubawati Lcr, Watsü Mungdang tir Maonginla, Ao Kaketshir Mungdang tir Nungdokyanger aser All Ward Union Mokokchung tir R. Ayim Lkr parnoki mapang tatsütsü agia shilem agi. Iba senden nung NLA Speaker Sharingain Longkumer, Advisor Dr. Longri aser NPF MLA Imkong L Imchen nungertema densema liasü.