Nagaland Congress-i CAB anema lungkak ait

BJP sorkari tamangba yimsü nung ajemdaker telemsa adokdaktsünür.

Kohima, December 11 (TYO): Lok Sabha nung Citizenship (Amendment) Bill 2019 agizükba anema Nagaland Pradesh Youth Congress (NPYC)-i Bodbarnü Congress Bhavan kima nung Union Home Minister, Amit Shah mesüka yanglur rongdok. It has destroyed one of the fundamental rights, which is right to equality, she said.
“CAB CAB ajanga Constitution tamendakdak raksatsüogo. Iba ajanga ‘right to equality’ samatsüogo,” ta All India Youth Congress (AIYC) secretary i/c Nagaland, Sarifa Rahman-i tanü osangbener dang ashi.
“Sorkari tesem balala nung aliba nisungtem nem temeten agütsütsü bilemer süra, parnoki tamangba yimsü nung masü saka meimchir meimba tangatetba nung inyaktsüba liasü” ta lai ashi.
CAB ya tamangba yimsü nung ajemdaker yangluba lir aser iba ajanga sorkari North East tesem lemsar yimsü asütsü meranger. Parnoki mezüngbo linük ajunga nung timtem majurutsü ta ashi, saka lir külen Hill state tem medendaktsütsü lemtetogo. Ajisüaka, CAB nungi Northeast state tem jenbua mali, ta Sarifa Rahman-isa ashi.
Tang Centre-i ILP malidak ILP bener arutsü meranger. Assam sülen ozüng alema arurtem atema lendong aketba tesemji Nagaland kübok Dimapur district lir. CAB kübok asenok lendong nungi jenbua mali, ta laisa metetdaktsü.
Sorkari tamangba yimsü nung ajemdaker asenok yimten aser lokti nung telemsa adokdaktsünür. Anungji North East ajunga ka kümer CAB anema noktaktsüla ta laisa shisem.
“Centre sorkari CAB ya taruba West Bengal assembly election dak rangloker inyaker, saka tarutsü nung parnoki Northeast kübok tanga tesemtem nunga iba ozüng benoktsü” ta Sarifa-i ashi.
“BJP sorkari Ram Mandir, Ayodha, Arrla 370 aser CAB indang jembir saka parnoki kechiba tetsürtem kümzüka ayutsü, mapa manguba, industry tasentem adokdaktsütsü aser gari lenmang yanglutsü indangbo mejembir?” ta laisa asüngdang.
“BJP sorkari telemsa adokdaktsünür saka Congress-i iba ya matalokdaktsütsü. Tamangba yimsü nung ajemdaker telemsa adokba mapa ajak anema onok noktaktsü” ta Sarifa-isa shise.
NPYC president Vilhousielie Kenguruse-ia lanurtem dang CAB 2019 anema noktaktsü ayongzük.