Nagaland Congress-i terenlok atema inyaktsü

Dimapur, April 12 (Agencies): Nagaland Congress-i Nagaland nung sorkar ketdangsübaren nung tashishitsü melii inyaktsü aser public asoshi tebilemtsü bena Nagaland renloktsü atema mapa inyaktsü ta tanü metetdaktsüogo.
Nagaland Congress ya regional political party ka lir aser parnoki Nagaland nung temelenshi bener arutsü aser Naga nunger temeten kümzüka ayutsü atema inyaker, ta taoba Congress minister, Nillo Rengma-i tanü ashi.
Bodbarnü Nagaland Congress indang party plenary session agidang Nillo-isa ashiba agi, par teloki Nagaland nung ochimashi agientsü.
“Nagaland nung yimtenren tsütsü temelenshi bener arutsü atema iba party tenzük. Temelenshi bener arutsü jangraba lennirtemi loktiliba len ania aotsü atema Nagaland Congress ya sabang tajung ka lir,” ta paisa shisem.
Naga nunger aliba litsü ajak ketdangsübaren ka kübok longjemtsü aser Nagaland nung nübo agi tangar memenepba teloktem indang temeten kümzüka ayutsü atema party-i mapa inyaktsü, ta Nillo-isa metetdaktsü.
Tanü senden nung taoba Nagaland assembly nung speaker aser Party Treasurer, Z. Lohe-ia o jembidang, tanü Nagaland nung temelenshi nüngdaker aser iba asoshi nisung ajak longjemer inyaktsüla, ta ashi.
Sentong nung Nagaland Congress vice president Khuosatho-i tesentepertem pela agizük aser Prasielie Pienyu-i anküp tepela o jembi. Iba sentong nung ex MLA Supongmeren Jamir aden.