Nagaland Congress ta ser regional party tasen ka tentetogo

Dimapur, June 21 (TYO) :  Tashishitsü melii yimsüsüba mapa inyaktsü aser terenlok bener arutsü nükjidong nung Mongulbarnü ‘Nagaland Congress’ ta ser Nagaland nung regional party tasen ka tentetogo.
Nagaland Congress indang tamaitsüji noksaji ‘Arju’ asütsü aser yimten telok balala nungi lennirtem külemi longjemer iba regional party ya tentetogo.
Ketdangsübaren nung temelenshi bener arutsü aser yanglushitsü nükjidong nung iba sabang ya tenteter.
‘Nagaland Congress’ indang nükjidongji Nagaland yanglushitsü, Naga nunger temeten kümzüka ayutsü, ochimashi agientsü aser electoral roll merüktettsü atema lir, ta tir tasen shimsang Nillo Rengma-i tanü metetdaktsü.
Nagaland nung arogotemi clean election atema inyakba mapa nung Nagaland Congress-i arogo pusema nungiter aser iba ya asangsang nung atalokdaktsütsü merangtsü, ta Nillo-isa ashi.
Tekaratiba nung Naga nunger ajaki aginüba ama telemtetba ka agitsü atema iba teloki Indo-Naga yimjung olemtep pusema nungittsü. Loktiliba nung alir shilem ajak indang tebilemba akhümtsübutsü aser nüngdakba mapang yariteptsü, ta Nagaland Congress Tir-isa shisem.
Nagaland Congress-i Election Commission of India den recognition atema mapa inyaktsü aser 2018 general election nung shilem agitsü, ta Nillo Rengma-isa metetdaktsü.
Tanü sentong nung Nagaland Legislative Assembly nung Ex- Speaker, Z. Lohe-i regional party tasen tentetba osang mezüng metetdaktsü aser pai ashiba agi, Nagaland nung yimten telok balala lir saka parnoki election atema dang ashi, melenshitsü aser yanglushitsü atema mebilemer.
“Nagaland nung yimten telok aika yimten asoshi masü saka business asoshi ang bilema inyaksangshir. Nagaland nung yimsüsürtemi mapa inyaktsü aser telemsa melii yimten ken o jembitsü atema yimten sabang ka nüngdaker. Election ochishia agitsü atema yimsüsürtem aser vote agütsürtem tsüngda tenangzütep agitsü atema sabang ka nüngdaker. Naga election agiba yimya agientsü aser Tsüngrem akhümtsübua Khristan election agitsü atema Nagaland nung chichiba yimten sabang ka nüngdaker,” ta Z. Lohe-isa ashi.
Nagaland nung tang rongdak nüngdakbaji temelenshi lir aser ibaji tila kümtetba lennirtemi acha-ayanga nendaka aser bendanga agüja inyakba ajanga dang ngutettsü. Ajisüaka, nüburtemi iba maparen nung pusema menungitra takok mangutsü, ta paisa shisem.
Tanü agiba sentong nung Ex- Parliamentary secretary Dako Phom, Ex- Candidate Prasielie Pienyu, Ex- Member, Dimapur Town Council GK Rengma, aser Ex-Chairman, NHHDC, Nagaland Dr. Roland Lotha nungertemia o tatsütsü jembi.
Nagaland Congress nung ketdangpurtem: President Nillo Rengma, Treasurer Z. Lohe, Vice presidents- Dako Phom, Prasielie Pienyu, Khuosatho, Generals secretaries- S. Supongmeren Jamir (Admn), Vaprumu Demo (Media & Spokesman), GK Rengma (Finance) aser Dr. Roland Lotha (Protocol & Frontals)
Dr. Roland Lotha aser Dako Phom nati Nagaland Pradesh Congress Committee aser Joshua Sumi-i All India Congress Committee dangi resignation letter agütsüogo.