Nagaland Contractors’ & Suppliers’ Union-i metetdaktsür

Dimapur, December 13 (TYO): December 15, 2015 nü gari lenmang noktangtsüsa akümba khuret nüburtemi angatetdaktsüner, ta Nagaland Contractors’ & Suppliers’ Union (NCSU)-i sangdong ka nung metetdaktsü.
Benjung mapang iba lungkak aitba sentong ayongzükba ya kija mesüra Contractor tem atema masü saka Naga nunger ajak ajangzüktsü atema lir, ta NCSU-isa ashi.
NCSU-i aiben Union Ministry tem dang Nagaland nung Mega Project ji shilem lemsar inyaktsü atema mepishiogo aser lokti senden ka nung Union Minister of Road Transport & Highways, Nitin Gadkari-i asemben tashi iba mapatong lemsar inyakdaktsütsü ta nangzük.
Iba mapatong nung local contractor tem anioktsü atema shilem lemsar inyaktsü ta Gadkari-i nangzük saka ibaji mapa küma meinyak. Arunachal Pradesh nungbo kasa project ji shilem lemsaogo, süra kechiba Nagaland nungbo yamaji meinyaker. Iba inyakyim ajanga Nagaland balaka amshiba sayur aser iba atema NCSU mepelar, ta NCSU President Pele Khezhie aser General Secretary John Kath nati sangdong ka nung metetdaktsü.
NCSU sangdong nungsa Kohima aser Dimapur atema kiyimba sentong nung adentsüpurtem senzütsü atema shia lir.
Iba anogo nung NCSU volunteers-i mapang ka nung Dimapur nungi aturtem Patkai College lenjem nungi aser Kohima nungi alurtem Naga Hospital Kohima lenjem nungi meintsü, ta NCSU mendenpurtemisa ashi.
NCSU-i December 15, 2015 anepdang 6:00 ako nungi nikongdang 6:00 ako tashi Patkai Christian College lenjem nungi Naga Hospital Kohima tsünglanglen aliba National Highway 29 tashi noktangtsü.
Iba tenokdangba nung Police, Para Military, Magistrate on duty, Ambulance aser Media Fraternity purbo madentsü, ta NCSU-isa metetdaktsü.