Nagaland dena state 6 nung HIV mozütem temogo

Dimapur, June 5 (Agencies): India nung Ministry of Health and Family Welfare-i HIV positive putetba nisung ajak angati anepalutsü ta sangdonger ita ka süir külen, state 6 nung iba dak sendakba mozütem temogo ta osang metetdaktsüogo.
State temji Bihar, Andhra Pradesh, Meghalaya, Nagaland, Maharashtra aser Delhi lir.
Mozü atemba dak alia ano Gujarat, Assam, Bihar, Uttarakhand, Mizoram, Andhra Pradesh aser Nagaland state tem nung HIV positive nisungtem indang immune levels tendangba diagnostic machines aser kits mali mesüra mapa meinyakba osang sangoktsüogo.
Taküm May 24 nü ‘National Coalition of People Living with HIV’-i National Aids Control Organisation (NACO) dang mozütem aser services akhi ama agüjang ta shidi ka zülu.
Shidi nungji, shiranger karbo mozü alitsü atema pei indang senti osettem aser rongsen yokdokba osang angazüker, ta zülua liasü.
Antiretroviral medicines ji anogoshia mapang tatakzük ka nung achitsüla aser doctor temi shirangertem dang mapang shitak nung mozü achitsü atema ‘alarm clock’ amshitsü ashir.
Yimtsüngtem nung aliba shirangertemi district hospital tem nung Antiretroviral Centres-i aoba anenogo, kechiyong parnoki idakji mozütem mangutsü ta metetbayong maoer aser parnok karibo treatment toktsüogo.
Taoba ita Lok Sabha nung HIV/AIDS (Prevention and Control) Bill 2017 agizüka mayudang, Union Health Minister JP Nadda-i tebang agi HIV positive nisungtem ajak angati anepalutsü ta shia liasü.
National Aids Control Organisation-i ashiba agi, mozütem aser diagnostic kits temadokbaji mapang tatsüka atema dang lir saka activist temi ashiba agi, CD4 kits ji joko ita trok tema mengui timtemer.
CD4 kits ji tawa tu aliogo aser CD4 machines indang jenjang atema tang tejembidak lir, ta NACO Deputy Director General, Dr Naresh Goel-i ashi.
Ano külen, mozü temadokba atema NACO-i state ketdangsertem dak tai tongloktsü. “Item state tem nung centre kar nung mozü kar maliba dang lir. Onoki State Aids Control Society tem dang mozütemji ajak kasa alemtsü tetuyuba agütsü” ta NACO Antiretroviral Therapy programme officer, Dr Manish Bamrotiya-i ashi.
HIV activist temi ashiba agi, National Aids Control Organisation aser state ketdangsertemi mozü aser diagnostics atema temulung magütsür.
“State ketdangsertemi NACO dang mozü magimadang osang sangoktsütsüla. Ajisüaka, parnoki mozü agimaba sülen ang osang sangoktsür” ta National Coalition of People Living with HIV, national coordinator, Firoz Khan-i metetdaktsü.)