Nagaland DGP-i police alidak sema senzür

Dimapur, February 6 (TYO): February 5, 2019 nü DGP Nagaland T. John Longkumer-i Yonglok Police Station, 2nd NAP Camp Yonglok aser Police station Anaki-C tem semdang.
Iba mapang Longleng, Mokokchung aser Kohima nung police ketdangsertem aikati DGP mein.
Yonglok Police station nung police den sensaksemdang T. John Longkumer-i ashiba agi, pai DGP mapa inyaktsü tenzükba sülen Nagaland kübok district, Police Station aser Outpost ajak semdanga senzür aser osang metetpelar.
Tensa süngjema ayutsüba tesemtemji arrtsü aser mangatettep aliba tesemtem lir aser iba nung pai tali temulung agütsür, ta Nagaland DGP-isa ashi.
Village council tem aser NGOs-i tekaratiba nung Yonglok Police Station lapokang ta ashiba atema pai iba station nung infrastructure aser police tashi reprangdangtsü atema aru, ta paisa shisem.
Yonglok Police Station ya kobi melii lapoktsü aser SP Longleng nem ketdangsüdaktsütsü ta John Longkumer-isa metetdaktsü.
Paisa Yonglok nung 2nd NAP post nung tang nüngdakbatem anepalutsü atema tenla agütsü.
Yonglok Police Station ya 2008 küm amenok aser infrastructure maparen ajak tembangba sülen November 2018 nungi mapa meinyaki aru. Ajisüaka, arrtsü anasa Police Station kanga nüngdak ta asüba agi December 5, 2018 nungi mapa inyaka arur.
Nagaland DGP John Longkumer-i tesem balala sema senzüdang Imlisunep IGP, Aotemsu DIGP, Rovishi Comdt. 12th IR, Raghuramarajan S.P Mokokchung, Yangba Konyak S.P Longleng, Lakha Khoza Comdt. 13th IR aser Kuhovi Sumi Comdt. 2nd NAP nungertemi meina liasü.