Nagaland ‘disturbed area’ atsülangshiba memeteti liasü: Rijiju

New Delhi, July 10 (Agencies): Northeast division nung home ministry ketdang asüsang, Minister of state for home, Kiren Rijiju-i, Nagaland nung “disturbed area” ozüng atsülangshitsü asoshi tawa telemtetba agiba indang pai memeti liasü, ta ashi.
Home ministry osang ajanga ashiba agi, northeast division nung Rijiju tekolak süaka Nagaland nung ano küm ka “disturbed area” atsülangshiba dak sentakba home ministry file ji pa dangi maru.
Northeast dak sentakba onüktem nung pai tongtibang shilem agia arur aser linük nung iba tesem pai maneni semdanger, ta parnoki ashi.
Iba dak sentakba nung phone ajanga asüngdangba langzüdang Rijiju-i, “Nagaland nung “disturbed area” atsülangshitsü asoshi tawa telemtetba agiba indangji ni kecha memeti liasü,” ta mepelaba osü agi langzü.
June 30 nü Centre sorkari Nagaland tesem ajak ya “disturbed area” ta küm ka atsülangshiba sangdonga liasü.
Ajisüaka Rijiju-i maneni home minister Rajnath Singh den amalitepa inyaker, ta kasa osang ajangasa ashi.