‘Nagaland Drug Abuse Prevention & Treatment Policy 2016’ sayaogo

Kohima, June 26 (TYO): Deobarnü Hotel Japfu, Kohima nung “Listen first” omen nung ajemdaker International Day Against Drug Abuse & Illicit Trafficking sentong ayongzüka mungogo.
Iba sentong nung Social welfare Minister, Kiyanilie Peseyie-i ‘Nagaland State Drug Abuse Prevention and Treatment Policy 2016’ sayatsü.
“Nagaland nung ozüng alema mozü achiba/shibelenba khuret azüoktsü aser yaritsü nükjidong nung state sorkari ‘The Nagaland State Drug Abuse Prevention and Treatment Policy’ agizük. Iba ozüng ya state government department, NGO, aser health & social activities inyakertem külemi yangluba lir” ta tanü Kiyanilie-i metetdaktsü.
Kiyanilie-isa, nisung ajaki iba khuret azüoktsü, asen loktiliba nungi drugs ajanga teraksa bener arutsüba agientsü aser alima tajungba kümdaktsütsü atema merangdi, ta ayongzük.
Mezüngbo ozüng alema drug shibelenba mapa ya loktiliba aser ozüng dak sendakba khuret ka dang liasü, ajisüaka kümtem süia arudang iba khuret ya alima nung health & security khuret tulu ka kümogo, ta paisa shisem.
“Drug trafficking aser drug abuse anema inyaktsübaji sorkar indang tebilemtsü khuret lir saka asen loktilibaia iba mapa nung tongti shilem agitettsü. Kibongtem, school tem, civil society aser Arogotemi pei telongtet nung drugs agientsü atema mapa inyaktsüla” ta Social welfare Minister-isa ayongzük.
“Asenoki temang anemalibaren aser meimchir temeten indang tangatetba nung ajemdaker inyakra, asen loktiliba nungi ‘drugs’ khuret agientettsü aser prevention, treatment & support agütsütettsü” ta paisa metetdaktsü.
Sentong nung Chief secretary Pankaj Kumar-ia o jembidang ashiba agi, meimchirtemi putusa putu aika drug indang khuret anema inyaka arur aser tang iba khuret ya kanga tuluka kümogo.
“Ozüng alema mozü achiba ajanga loktiliba asoshi lendong tulu bener arutsür kechiyong iba ajanga rongsenren takoksa ajurudaktsür, AIDS dena health khuret tulu bener arutsür aser lokti ajunga menentsür,” ta Pankaj Kumar-isa shisem.
“Loktiliba aser sorkari iba khuret anema pei tajungtiba agüja külemi raratsüla” ta paisa ayongzük.
Nagaland Chief Secretary-isa police department dang check gate nung amenertem nem osang tejangja sangoktsütsü aser angatettsü atema mepishi.
Ozüng alema mozü shibelenba noktangtsü atema excise, police, tanga department tem, security forces dena state intelligence agency tem külemi inyaktsüla, ta Pankaj-isa mepishia metetdaktsü.
Tanü sentong nung I. Toshitsungba, (IPS), IGP Crime (PHQ)-i tesüiba küm pungu tsüngda state & enforcement temi ozüng alema shibelenba mozütem apuba osang metetdaktsü.
Sentong nung mendenji Dellirose M. Sakhrie, IAS, secretary social welfare liasü, taoba NMA president & Padmashree awardee Neidonuo Angami aser member secretary NSLSA Nino Iralu natia o jembi, Besuto Nienu-i ken ka aten aser Abou Mere, director Kripa Foundation-i anküp tepela o jembi.