Nagaland Dy. CM-i ayongzüker

Dimapur, April 12 (TYO): COVID-19 wara ajanga linük ajunga shibangtsü tenzükba sülen nungi state sorkari Nagaland nung iba wara marudaktsütsü atema tanen makai mapa inyaka arur, ta Deputy Chief Minister Y. Patton-i ashi.
“Tsüngremi tanü tashi Pa taochi agi Nagaland nung alirtem kümzüka ayuba atema Pa dang pelar. Maneni, Nagaland nung COVID-19 anema tongti süa inyakertemi taküm bendanga agütsür inyakba atema pelaba shisemer” ta Y. Patton-isa ashi.
Paisa Nagaland nung senso shiai sorkar tetuyubatem sülen anidaktsü aser zübazülema malitsü atema mepishia metetdaktsü.
Medical, Police, media personnel, District Administration, Village Councils, NGOs, chiyungtsü agütsürtem aser public-i iba wara anema inyakba nung shilem tajung agiba atema pelar, ta Nagaland Deputy Chief Minister-isa ashi.
y. Patton-i BJP MLA tem aser party züngsemtem dang maneni iba tensa nung nüngdakbapurtem yaritsü atema mepishi.