Nagaland election nung BJP & NDPP menden lemsateptsü

Guwahati, Tsüklai 3 (Agencies): Tsüklai 27 nü Nagaland assembly elections atema BJP-i National Democratic Peoples’ Party (NDPP) den menden lemsateptsü tenangzükba agiogo ta Küptoknü Union Minister of State for Home aser BJP lennir tejen Kiren Rijiju-i ashi.
Rijiju ya Nagaland election atema BJP in-charge lir aser tanü taoba Nagaland Chief Minister aser tang teinyakdak Lok Sabha MP Neiphu Rio den külemi Guwahati nung osangbener senden ka nung pai iba osang metetdaktsü.
Taruba Nagaland assembly election nung NDPP-i menden 40 aser BJP-i menden 20 nung tokteptsü. Rio-i tawa tu NPF nungi anener NDPP nung aden.
“BJP aser NDPP nati Nagaland nung menden teimba nung takok angutsü aser taruba sorkar akümtsü” ta Rijiju-isa ashi.
BJP ya Naga Peoples’ Front (NPF)-i aniba Democratic Alliance of Nagaland (DAN) nung dena liasü. NPF ya 2003 nungi BJP-i aniba National Democratic Alliance (NDA) nung teyariteper ka ama shilem agia arur.
“NPF ji onok tsükchir masü aser BJP-i mapang talangka tejaklen nungi parnok den tesentaktep lir. Ajisüaka, tangbo onoki NPF den tesentaktep mayutsü” ta Rijiju-isa shisem.
“Taoba mapang BJP ya Nagaland nung party tila ka dang liasü. Ajisüaka Nagaland nung BJP tashi tuluba kümogo aser election matongdang NDPP den menden lemsateptsübaji tongtipang aküm” ta paisa metetdaktsü.
Nagaland nung NSCN (I-M) aser Core Committee of Nagaland Tribal Hohos and Civil Organisations (CCNTHCO)-i election magitsü akhangba atema osangbeneri asüngdangdang Rijiju-i “ni tema aser telung nung aliba telok ajak dang amaliteptsü mepishiogo kechiyong election agitsüba ya temzüng nung lateta lir” ta langzü.
“Onoki NSCN(IM) dena telok ajak dang iba osang metetdaktsüogo. Onoki parnok dang election tensa meraksatsü shiogo. Telok ajaki ceasefire ground rules sülen anidaktsüla aser ceasefire nungi pilaba ajanga tajung kecha madoktsü” ta Union Minister of State for Home-isa ashi.