Nagaland Electoral Roll: 2 buba Partnering NGOs senden jateper

Dimapur, October 15 (TYO): Kohima, Hotel Japfu nung 2 buba Partnering Non-Governmental Organizations (NGOs) senden tan October ita 19 anepdang 11:00 ako nungi tenzüka amentsü ayongba osang ka Chief Electroal Officer (CEO) Nagaland, Sanjay Kumar IAS-i tanü sangdong ka ajanga metetdaktsüogo.
“Tan October ita 1 nü nungi tenzüka Kohima nung inyakba Special Summary Revision of Electoral Roll (ER) 2016 mapatong den sentakba tongti onüktem benoka jembitsü asoshi tan senden ya jateper,” ta pai ashi.
ER nung vote agütsütsü temeten alir senso ajunga indang tenüng züluoktsü, vote agütsütsü temeten maliba sensotem indang tenüng ajunga ER nungi agientsü aser ER nung tenüng züluoka alir senso ajungai pei mulungka agi vote agüja election nung shilem agidaktsütsü nükjidong nung iba mapatong ya tenzüka lir.
Ano, tan ER reprangshitsü mapatong inyakba ajanga ER nung taila tenüng mezüluoktsü, nisung ka tenüng anaben mezüluoktsü aser pei talidak dang ER nung tenüng züluokdaktsüba ajanga ER merüktettsü alizüng ayuba osang jangjaogo.
Nüburtemi ER nung pei tenüng züluokba ajanga election nung shilem tajung agidaktsütsü, democracy yimsüsüba inyakyim den sentakba temetettsü osangtem nüburtem dang metetdaktsütsü, ER nung tenüng mezüluoki aliba senso tenüngtem ER nung züluokdaktsütsü aser election den sentakba maparen ochishia aser takokba nung inyaktsü tasa balala reprangshitsü onüktem tan senden nung tongtibangsüa benoka jembitsü sentong renema lir.
State Level Organizations (SLOs) kübok densemba BJP, INC, NCP, NPF, Naga Hoho, NSF, NPMHR, ENSF, ENPO, ENWO, NMA, The Naga Blog, Youth Net, BASN, NBCC, CAN, NCRC aser Nagland Pentecostal Church aser Tribal Hohos (THs) kübok densemba Angami Public Organisation, Sumi Hoho, Ao Senden, Kyong Hoho, Chakhesang Public Organisation, Pochury Hoho, Rengma Hoho, Konyak Union, Phom People Council, United Sangtam Likhum Bumji, Yimchungru Tribal Council, Khiamniungan Tribal Council, Zeliangrong Baudi Nagaland, Chang Khulie Setshang, Kuki Inpi aser Kachari Tribal Council Nagaland nunger shiai pei züngsem anana yoka iba senden nung shilem agitsü asoshi CEO-i kasa sangdong ajanga metetdaktsüogo.