Nagaland Foot Hill Road lapoktsü anünga aliba mapa osang

~ C. Onen Walling,  General Secretary, ASTD.

Naga nunger ajaki kodang koba anogo ka iba lenmang lapoktsü ta yongyaseta ataba tenemtsüng lenmang (Nagaland Foot Hill road) mapang tatsüka nung takok ngua inyakdagi.
Nagaland State Sorkari iba lenmang lapoktsü sentong tenzüker küm 39 tashi süia oaka iba lenmang mapa asoshi tongpua anepalur maliba agi melapokteti lia asen Ao kin-i anir arok pur kin tukü ter-sanger lenirtemi taküm nübo mapang shisatsü den rongsen pei peisasa tenlatepa nükenbelem den nübotsük mesasai lenmang bushitepba ajanga State Sorkar nungi teyari taoba Nagaland Chief Minister Wb.Nephiu Rio, pai tamasa sen crore 40 aser tanaben crore 30 ta ajak agi crore 70 agütsüba agi tesem anasü nung lenden lima lenmang yanglutsü km 8 anünga aliba dak alaka lenmang ajak tujema renemdagi.
Niuland sector nung km 5 aser Naginimora sector nung km 3 ajak agi lenmang metujemi alibaji km 8 ya yanglutsü atema tang sen crore 11 nüngdaker, asen tia maka mapang ka State sorkara sen yur magütsür masü sorkar senpong tazüng mapang ka tenchishia atar. Taoba küma asen Ao kin nungi Lagislature-tem den anaben asemben tashi ka iba atema ya juri- tsüngzüka sen bushitsütsü shisa lemsatep mapang agia aruogo, saka Sorkar senpong tazüng nung parnoki kong nungi bener arutsütettsü, kodang Centre nungi sen yokdir dangji yaritsü ta nangzükba jagi danga nuburi peladi.
Iba tebilemtsü atema ya Nagaland Foot Hill Road Co-ordination Committee pur taoba 11th February, 2016 Kohima nung Nagaland Chief Minister ajura jembidang Wb.T.R. Zeliangi ashibaji, Centre nungi State-tem nung terenlok mapa inyaktsü sen lemsaba yimya melenshiba agi tang tashi asen lima nung terenlok mapa teinyakdak alibatem ajak atema senotsü kecha lemzükja tonga arua mali, iba jagi tang ya süa liang ta kecha meshiteter, Saka ni tenemtsüng lenmang mapa atema nüngdak senji bushitsütsü. Centre nungjagi senotsüji maruyonga Nagaland Foot Hill Road metujemi aliba aser teyanglushitsü aliba tesemtem renema lenmang lapoktsü atemaji taküm Budget 2016-2017 nung atepatsüa lemzüktsütsü ta nangzükbaji kanga osang tajung. Iba anogosa NFHRCC puri Chief Minister pa dang item tanüngba mapa ya meyiwa marudangsa renemtettsüsa senotsüji kanga nendaka bushitsütsüla ta takangba shiogo. Iba lenmang nung tang apu tulutibaji Doyang ayong apu koba Govemor”s Camp Liphayan nung yangludagi, iba yabo kanga temolung süa mapa inyakdagi, Kanga tia majung ka matalokra taruba tsüngküm mongpu nungjibo iba ya renemer alitsü ta tamang akar. Dimapur nungi Tizit tashi nung apu (Bridges) tila 40 shi ka yanglutsü adoker, saka tsüngküm nung gari tajungtemi ayong tilatirejibo ajanga suitettsü ta teimla lir.
Tanü iba lenmang lapokba wadang nung ya pi pur kin ti tuko sangera dena lirko, saka Ao kin lenisüba nung sen lenmang bushitsütsü asoshi Aor Lagislatures par 11 prongla nem asen lenir aser yimsüsür Wb.Nuklutoshi, Minister, National Highways, Mechanical Engg & Election, tayonger,aser Dr.Benjongliba Aier, Parliamentary Secretary Agriculture, Dr.Imtiwapang Aier Parliamentary Secretary Geology & Mining tatong tayonger ta tangar dak alia khuret bena yaritepa arudagi. Tia ka-a tang asen State Sorkar National Highways Ministerji asen nuboi bena atashiba mapang ka lir, aser ASTD lenirtem den iba khuret lamsatepdang pai ashibaji ni akokba tashi ajak agi yaritsü, kodang tang teinyakdak lenmang ya lapokdir iba lemang ya National Express Highway ta melener 2-line yanglutsü Tizit nungi Dimapurji gondha ka sur tesadang nung atongtsüsa tatsütiba asütsü atema nüngdak tesem kar nungbo tekong tenem ongken (Tunnel) meja-a atutsü kü mangdang lir ta shia liasü. Yamaji asen Ao kin nungi State Sorkar nung yimsüsertemi anir kanga meranga iba wadang takok angutsü teimla nung inyakdagi ta lemsateper. Nagaland Foot Hill Road yabo sangküm, 2017 mongpu tashi nungjibosa renemtettsü ta tamang sarasadem lir.
Iba wadang tenzüker küm ana asem maparen balala inyakyonga arudang tebilemtsü khuret ajuruba ajak nung Tsüngremi lenmang lapokja anir arudagi,aser iba temoatsü ya Arogotem nung amangba puri sarasadem nung nungitba ajanga ta küli asür, Maneni asen State Sorkar nung yimsüsertem Department nung Ketdangsürtem aser kin ter nungi NFHRCC nung züngsemtem ajak nem arishi tetemjen den iba wadang tekaratiba nung renemtettsüsa rongsen lemang lapokjang ta sarasadem nung maneni nungita yaritsü ayongzüker.