Nagaland Football Coaches Association tentetogo

Kohima kübok Ura Hotel nung Nagaland DGP (retired), K. Kire aser tan asensa tentetba Nagaland Football Coaches Association (NFCA) nung ketdangpurtemi agiba arok noksa ka yangi angur. (Kohima, September 21)

Kohima, September 21 (TYO): Asian Football Confederation (AFC) nungi coach inyaktsü temten ngua alirtemi Nagaland tezülen alir football asayatsü sempet alir lanurtem anitettsü tayongzükba olen ka Nagaland DGP (retired) aser football asayar mongin, K. Kire-i tanü, Bodbar nü sangoktsüogo.
Kohima nung Nagaland Football Coaches Association (NFCA) tentettsüdang Kire-i tanü iba tayongzükbaji agüja liasü.
“Football kanga junga asayatettsüsa Tsüngremi Naga lanurtem nem asoajen agüja lir saka tesayuba tajung magütsüba ajanga football asayatsü sempet alir lanurtemi bilemba ama takok ngua masayatetter,” ta pai ashi.
“Nagaland nung AFC nungi temeten anguba coach 82 tashi lir,” ta shia, mebushiteti alir football asayatsü sempet alir Naga lanurtem nem national jenjang tashi nung terenemshiba ngudaktsütsü nükjidong nung Nagaland tezülen densemba tesem ajungai tsüngdonga oa asayartem anitettsü asoshi Kire-i coach-tem ayongzüka liasü.
Ano, Nagaland nung football asaya temaba jenjang nung ajungkettsü mechi AFC coach-temi par tashitemetetbaren temaba jenjang nung maneni ajungkettsü merangtsü asoshi pai ajungshi.
“NFCA ya kanga menor ang tenteter ta sasa bilemer. Ajisüaka, NFCA tentetba ajanga Nagaland nung football jenjang taoba mapang nungi tajungba akümtsü imlar aser NFCA-i par wadang nung takok ngudakjang ta sarasademtsür,” ta Kire-i metetdakja liasü.
“Coach-tem asoshi tanaben renemshitsü sentongtem aser sempet alir asayartem atema tesayuba agütsütsü sentongtem mapang shia ayongba ajanga Nagaland nung football asaya temaba jenjang nung ajungkettsütsü alizüng lir,” ta AFC nungi ‘B’ temeten abener, NFCA Tir, Roko Angami-ia metetdaktsü.
Roko lenisüba kübok Akho Pusa, Kadilinbo & Lima Ao nunger Vice Presidents; Ayeto Ayemi General Secretary; Keyigumgwangbe, Wati & Olando Joint Secretaries; Vesupra Kezo Finance Secretary; Gagangpou Treasurer; All India Football Federation ‘B’ football instructor, William Koso Technical Advisor aser Asou-u Linyü Assistant Technical Advisor nunger densemba ketdangpurtemi NFCA 2016-19 tashi ketdangsüa anitsü atema shimogo.