Nagaland Foothills Road atema tax magütsütsü

Dimapur, Luchii (December) 3 (TYO): December 2, 2018 nü Nagaland Foothills Road Coordination Committee (NFHRCC) senden ka amen.
Senden nung Committee-i Doyang Bridge yangluba maparen mapang shia semdangtsü lemtet.
Apu yangluba mapa tenzükba osang angashia kanga pelar aser contractor o mapa inyakertemi committee pur arudang amalitepa yariteptsü mepishir, ta NFHRCC-i metetdaktsü.
NPGs kari contractor dang tax meshitsü meranger ta osang angazüker saka ibaji magizüker aser memelar. 2013 küm iba lenmang yanglutsü atema tenzükdang NFHRCC aser NPGs tsüngda iba tax magitsü telemtetba agi anungji NPGs shingaia iba tangatettep alema meinyaktsü mepishir aser kari danga inyakra, parnokji Naga nunger anemertem ta züngshitsü, ta Committee-isa ashi.
Nagaland sorkari Naga otsüsütsü mapa atema süoki ia bilemtsüba atema kanga pelar aser maneni Road & Bridges Minister, Tongpang Ozukum aser Chief Minister Neiphiu Rio nati nangzükba ama anünga aliba uncut portions atema work orders agütsütsü mepishir, ta NFHRCC-isa metetdaktsü.