‘Nagaland for Christ’ ya Dimapur kija atema masü

Dimapur, March 16 (TYO): Northeast India nung nisung temeyoktep aliba aser kanga kara ainba yimtitem rongnung Dimapur dena lir. Iba yimti nung alirtemi temeshi Amungnü dena hopta piyong mazüngi dang alir.
Talisa Nagaland kübok tesem balala nungi dang masü saka tangalen nungia nisungtem Dimapur nung shishitsü atema arur aser Deobar dena parnoki shishilembatsü atema arur, ta Naga Council Dimapur (NCD), GBs Union Dimapur, Dimapur Urban Colony Chairman Federation, Naga Women Hoho Dimapur, Dimapur Chamber of Commerce and Industries, Business Association of Nagaland, aser East Dimapur Business Association teloktemi metetdaktsü.
Council for Nagalim Churches (CNC)-i osangkakettem nung Deobarnü shishilemba masütsü atema temepishiba agütsüba nguogo aser onoka Khristan tamangertem ama Naga nunger tamangba yimsü nung noktaka lir. Ajisüaka, tamangba yimsü aser tamang ya pei mulung lir anungji onoki CNC den mangatettep kecha mali, ta parnokisa ashi.
Dimapur ya yimti tasü ka masü. Iba yimti ya anogoshia ainba tesem ka lir aser Deobar dena anogoshi Dimapur-i shirangertem arur. Kar train, kar bus, tayimtsü aser taxi ama nung arur. Anungji nisungtemi chiyungtsü aser tanendak nüngdaker, ano tanü-asüng hopta piyong mazüngi aliba agi nisungtemi kou mejebtsü atema mapanga madoker, ta parnokisa shisem.
NSCN/GPRN ketdangsertemi Petrol Pump, Hotels & Restaurants, Medical Stores, Pharmacies, Bakeries & Confectionaries, Travel Agencies amala ka khen ka ta lapokdaktsür. Osang tejangja kar angazükba agi ketdangsertemi tang Saloon Owners den jembidar aser iba jagi kobii melii Deobarnü Saloon tem-a lapoktsü imlar. Dimapur jila ya dang Khrista asoshi ta mezüngshitsüla kechiyong ‘Nagaland for Christ’ ya Nagaland kinük-kisang ajaklen atema lir, ta Dimapur nung tongtipang teloktemisa metetdaktsü.