Nagaland government mapa nung ‘contract’ nung meshimtsü

Dimapur, August 11 (TYO) : Taoba küm aika Nagaland state government nung alirtemi pei sünütsü süa ‘contract’ nung government tenzükertem shimtsü aser küm ishika lir külen regularize sütsütsü ta inyaka aruba tim masüba mapa ka Gauhati High Court, Kohima Bench ajanga August pongo nü to agientsüogo.
Anungji, tang nungibo tatidang magi government mapa nung shinga meitettsü. Iba obendang ya Dr. Atouzo Vs State of Nagaland aser Umadevi case nung Nagaland Chief Secretary-i tezüluba nung cabinet dak government mapa nung Contract/adhoc nung shima alirtem regularize sütsütsü tashi mali ta okadak agütsüba nung ajemdaker bendangtsüogo.
Tamalenbo state government mapa nung adhoc aser contract nung aiertem mapa nung küm 3 jungra regularize sütsütsü ta lemteta liasü, iba jagi state government-i contract aser adhoc nung shimer nisung meyirijang aika regularize sütsügo.
Ajisüaka, tang nungibo contract aser adhoc nung shima alirtem shinga regularise mesütettsü aser contract nung shima alirtema küm ka sülenbo mapang matsülangtsütsüla, item mapa nung inyakertem ajakji tatidang jungjunga agir dang shimtsüla ta obendang jangjajangjaa agüja lir.
Iba ken o ya okadak ACAUT teloki agütsü aser parnoki aginüba ama obendang agütsü, anungji state government-i obendang agütsüba amaji shitak meinyakra, ACAUT teloki obendangdaki ken o tanaben bener arutsü akok ta obendangdak nungi metetdakja lir.
Joko, tang nungibo government mapa tazüng adokba ajak lanurtem ajaki merangdangtsüsa yimjak nung sangdongtsüla aser tatidang jungjunga agir dang shimtsüsa inyaktsüla ta ACAUT Nagaland teloki department shia nung tekolak purtem dang metetdaktsüogo.