Nagaland Governor-i Chennai nung Naga Reju semdang

Dimapur, Rongjui/Sept. 04 (TYO): Nagaland Governor, PB Acharya-i Luroi/August 25, 2018 nü Chennai semdangba mapang iba yimti nung Naga nunger indang restaurant ka tenüng agi “Naga Reju” semdanga liasü. Iba restaurant ya Nagaland nungi Maong Jamir-i Loyola College anasa lapokba lir aser pa ya Chennai nung PhD agir ka lir.
Kaket shisatsü angazükba nung takotet süaka entrepreneurship nung ajemokba asoshi Governor Acharya aser pa kinungtsü Kavita Acharya nati Maong Jamir aser pa kinungtsü na nem tenüngsang agüja liasü aser entrepreneurs tasentem ajungmesotsü, ta shisem.
Tangar asoshi inyaktsüba ya alar ama lir, saka nai angatetba nung nokdaker Entrepreneurship nung ajemoka employment adokdakjang, ta Angh-isa ajungshi.
Angh-isa Naga nunger chiyongtsü alima nem metetdaktsüba asoshi Naga Reju nem tenüngsang agütsü. Paisa iba restaurant kibur dang Nagaland nung yanglutetba ola-angla aser teka mapa nungi adokba osettem bener arua sayua ayoktsü ajungshi.
Nüburtem tali puatsü aser Nagaland nung adokba osettem ajungkettsü mechi Governor-isa Naga Traditional Wooden Bowl, süngkum agi yangluba marok, süng agi yangluba spoon aser aosotem bener arua amshitsü ajungshia liasü.
Governor Acharya aser pa kinungtsü nati iba restaurant nung kibur aser yangji inyakertem den külemi Naga nunger chiyongtsü chia liasü.