Nagaland Governor-i COVID-19 osang metetpela

Dimapur, April 14 (TYO): Nagaland Governor R N Ravi-i tanü state nung COVID-19 dak sendakba osang metetpelaogo.
Raj Bhavan Kohima nung senden amendang Nagaland Chief Secretary Temjen Toy, Commissioner & Secretary Home, Commissioner & Secretary Health & Family Welfare aser Director General of Police nungertem aden.
Dimapur nung alir ka dak COVID-19 putetba sülen tanü senden nung coronavirus anema inyakba mapa nung metokmeperi aser tashimaitbatem ajiteta, tajungba nung inyaktsü atema tebilembatem lemsatep.
Senden nung Nagaland Governor-i Chief Secretary lenisüba kübok department ajak dena “COVID-19 WAR ROOM” ka tentettsü tebilemba ka benok.
Iba “War Room” nung health dak sendakba maparen ajak adentsü, tongtipang nüngdaktem osang agitsü, COVID-19 dak sendakba law & order maparen, tangalen anendaka aliba nisungtem indang osang metetpelatsü aser anogoshia state nung COVID-19 indang osang tongteptsü, ta Governor Ravi-i ashi.
Nagaland nung BSL Laboratory ka amenoktsü atema Defence Minister Rajnath Singh-i Mumbai nungi Dimapur tashi tayimtsü ajanga osettem bener yokba atema pelar, ta RN Ravi-isa ashi.
Assam aser Manipur-i Covid 19 tendangtsü atema bener meyoki BSL Laboratory nung tendangtettsü. April 15, 2020 nü osettemji Airforce tayimtsü ajanga Dimapur tonga bener arutsü, ta paisa shisem.
Külen, Narendra Modi-i May 3, 2020 tashi linük ajunga shibangtsü telemtetba shitak agiba atema pelar, ta Governor-isa metetdaktsü.
Iba ajanga khuret aika adoktsü saka sorkari nübortem yaritsü nangzüka lir aser akokba tashi yariteptsü, ta paisa ashi.