Nagaland Governor-i Mumbai nung osangbenertem den jembi

Governor of Nagaland, Shri PB Acharya-i Maharashtra Patrakar Sangha, Azad Maidan, Mumbai nung Luroi/August 28, 2018 nü osangbenertem den jembiba noksa nung angur.

Dimapur, Luroi/August 30 (TYO): Maharashtra Patrakar Sangha, Azad Maidan, Mumbai nung Luroi/August 28, 2018 anogo Nagaland Governor, PB Acharya-i osangbenertem den jembiba mapang, linük yangluba nung media ajanga shilem tajung agitsüba aser süoki ia osang abenba (print aser electronic) ajanga linük terenlok nung shilem agiba indang lemsatep. Media dang ya ‘fourth pillar of democracy’ ta ajar.
Angh-i tongtibang osangkaket aser News channel balala indang osangbener tem den jembiba mapang linük ajunga renloktsü asoshi NAMASTE NORTH EAST States renloktsü indang jembi aser iba maparen nung media ajanga tongtibang shilem agitsüba indang jembia liasü.
“North East tesemtem renloktsü asoshi 3Es – Education, Electricity aser Employment – ya kanga tongtibang lir. North East India tajungba kümdaktsütsü asoshi India nunger ajunga tebilemtsü lir, kechiaser taoba mapang iba region ya senzüka yutsü,” ta Nagaland Governor-i ashi.
Kodang state ajunga kasa renlokdir, idangjiang linük ya tashi ita renloktsü, ta paisa ashi.
Paisa osangbenertem dang, nüburtemi North East India shidak agizüktettsüsa shilem tajung agia North East region nung tajung tsütsü temulung agütsütsüla, ta ajungshia liasü.