Nagaland Governor-i reju balala ketdangsertem ajuru

Dimapur, Rongchii 17 (TYO): Centre aser state indang schema balala mapa küma inyaktsü ya sorkar dak sendakba agency tem kisüng indang khurte masü saka university college aser school tem khureta lir, ta Nagaland Governor, PB Acharya-i Nagaland nung aliba university balala, Bharat Scouts & Guides, Hindustan Scouts & Guides, Raj Sanik Board aser NEZCC nungi ketdangsertem den Rongchii (April) 17, 2018 anogo Raj Bhavan nung senden ka amendang ashi.
Jan Dhan Yoyana, Jeevan Yyoti Bima Yojana, Sukanya Samriddhi Account aser Mudra Bank amala schema aser welfare programme aika lir, koba agi nüburtem ajangzükba aser jenjang temabai ajungketba nung yarir. Saka nisung timbai iba amala sentongtem memeteti lir, ta Governor-i ashi.
Governor-isa iba senden nung adenertm dang kaketshirtem densema nüburtem dang iba ama scheme tem indang osang metetdakja tajangzük agidaktsütsü ajungshi.
Nisung ka sempet tamaba jenjangi ajungkettsü ya kanga tongtibang aser reju balalai kaketshirtem mapa inyaktettsüsa temulung agütsütsüla, ta Acharya-i ashi.
Kaketshirtem aser talisa tajemzükba jenjang nung alirtem entrepreneurs kümdaktsütsü mechi Government of India-i Mudra scheme tem tenzüka lir, ya paisa shisem.
Nagaland nung lanurtem tarutsü nükla nung len anitsü asoshi University aser reju balalai shilem tajung agitsüla. Kaketshirtem university aser reju balala nungi adokba mapang parnok sasa parnok tetsüng agi nokdaktettsüla aser state nung rongsenketsüng tashi taitba kümdaktsütsüla, ta Governor Acharya-i ashi.
Reju ajunga nung Skill Development course tem inoka amshitsüla aser iba ajanga kaketshirtem atema mapa balala, pei sasa pei peria aliba nung yaritsü, ta pai maneni ashi.
National Academic Depository amenokba osang HRD Minister, Government of India, Prakash Javadekar-i künem metetdaktsüogo. National Academic Depository ya academic award ajak asoshi 27×7 online store house ka lir, ta Nagaland Governor-i metetdaktsü. National Academic Depository ya academic award atema kisüng masü saka yangi reju balala inyakyim kanga junga rizünga yuteter, ta paisa ashi.