Nagaland Governor-i vote agütsütsü ayongzüker

Dimapur, April 10 (TYO): Nagaland Governor PB Acharya-i nübortem dang elections nung shilem agitsü atema ayongzük.
“Democracy ka nung elections ajanga tongti shilem agir aser iba ajanga asen tarutsü tia yanglur. Vote enoktsürtemi shilem agiba ajanga elections tashi itdaktsür aser asenoki tamang akartem shimteter. Democracy ka nung vote enoktsübaji nü indang temeten lir,” ta Acharya-i ashi.
Indian Constitution ajanga India senso tain ajak nem vote agütsütsü temeten agütsür. Anungji senso ajaki sorkar tajung aser temerük ka kümtettsü telemtetba agiba nung shilem agitsüla. Vote shiaji senti lir aser iba jagi asen linük len anitsü, ta paisa ashi.
Governor Acharya-isa tang mezüng agütsütsü aliba voter tem dang alima nung democracy indang benjung tulutiba nung shilem agitsü aser nü indang vote amajok tekümdaktsü ta tayongzükba balaka agütsü.