Nagaland Governor RN Ravi-i jembiba aitsür: NSCN (IM)

Dimapur, March 3 (TYO): Bodbarnü NSCN (IM)-i Nagaland Governor aser Centre atema Interlocutor, RN Ravi-i jembiba onük aitsüogo.

Indo-Naga yimten olemtep atema teloktem maneni jembishinüdar aser olemtep junga dang agidar, ta MIP, NSCN/GPRN sangdong ka nung metetdaktsüogo.

“Tawa Nagaland Assembly nung RN Ravi-i mebilemdangi Indo-Naga yimten olemtep tembangogo ta jembiba ajanga terata adokdaktsüogo. Pai aiben jembishinüa arudang Interlocutor ka ama masü saka Nagaland Governor ama dang jembir. Pai Interlocutor ka ama mapa shitak meinyaker” ta MIP-isa ashi.

Naga yimten latetba nung metokmeperi malitsü atema August 3, 2015 nü NSCN/GPRN-i sign asüba Framework Agreement lepshir. Taoba Parliament session nung Indo-Naga yimten olemtep indang osang ashidang Union sorkari olemtep tatemleni arudar ta metetdaktsüogo.

“Iba ya Indo-Naga yimten olemtep jenjang lir aser NSCN nungi jembishinürtemi Naga nunger maitsü kümzüka ayutsü atema meranga jembia arudar” ta NSCN/GPRN-isa ashi.

Ravi-i linük tsüngdang iba ama osang tai sangoktsüba atema sasa bilemer. Pai India sorkar aser Indian Parliament-i ashiba den kanga meputep jembiogo. Naga yimten tebilemtsü atema jembidang kanga junga shisadanger ang jembitsüla ta parnokisa metetdaktsü.

“Telok anaprongi Indo-Naga yimten olemtep ya Naga nunger aser India sorkari agizüktettsüsa lemtettsü atema jembia arudar. Onoki kodanga Naga nunger maginütsüsa meinyaktsü aser molungtepba ama mesüi agreement kecha nunga sign masütsü” ta MIP, NSCN/GPRN sangdong nung metetdaktsüogo.