Nagaland govt-i telok tentet mashi agizükbaji taoksatsüka : NPA

Dimapur, July 07 (TYO): Nagaland nung aruagi Newspapers Association of India (NAI) tenüng nung nisung ka tenüng agi Monojit Singha-i anir osangtsüsang adokbaren nung kenyongi sendaktepba maliba nisung kar anir Nagaland angh P.B.Acharya ajurua tezüluba nung onük kar agütsüba mapaji tetamatsü mapa ka asütsü, anungji state government-i ibaji jangjashitsütsüla ta tanü Hokolbar nü Nagaland Press Association (NPA) teloki metetdaktsüogo.
Ano, tesüngmangtsü kaji, iba ama mejangjatetba telok ka Nagaland angh-i April 18, 2017 nü Raj Bhavan nung ajurua parnok ket nungi memorandum ka agizük aser iba kasa shidiji Chief Secretary-i IPR department dangi mapa küma inyaktsü asoshi yok ta angazüker. Nagaland nung osangtsüsang adokertem den masüngdangtepi tapi agi aruagi Newspapers Association of India kongsang (Nagaland chapter) ka lapoker state government nung tekolakba ajurubaji taoksatsü mapa ka asütsü ta NPA-isa metetdaktsü.
Iba telok Nagaland nung tentetba ya osangtsüsang adokertemi memeteti inyakba mapa ka liasü aser iba telok nung lenirtemjia Nagaland nung osangtsüsang adokba maparen nung inyaker kata mali ta jangjaogo ta NPA-isa metetdaktsü.
Iba ama teloki inyakba mapajibo tajung asütsüa akok, saka Nagaland nung osang adokertemi memeteti osang adoker telok tentetbaji kenyongi magizüker ta NPA-isa metetdaktsü. Ano, timtem kaji NAI Nagaland chapter tenüng nung shimba ketdangpurtem rongnung president – C. Atsaba Sangtam, Vice president -Chichamo Humtsoe aser General Secretary – Thungchamo Humtsoe nungertem ya shinga osangtsüsang adokba maparen nung meinyaker ta NPA-isa metetdaktsü.
Item mapatem ajak rongnung taoksatsü kaji Nagaland Governor, Chief Secretary aser IPR department-i iba ama telok tasen arubaji mejangjatepi aser Nagaland nung adokba osangkakettem adoker aser yimozülurtem dena kecha masüngdangtepi agizüka parnok dak temulung lemtetbaji asütsü ta NPA-isa metetdaktsü.
Iba ama telok arudang teti jangjashiteptsüla aser Nagaland nung osang adoker aser osangbenertem tenüng memenentsü asoshi state government-i iba telok ya kodaser agizüka amshiar jangjashitsütsüla ta NPA-i takangba ka agütsüogo.