Nagaland govt. inyakyim ajak paralyse süogo; P.B.Acharya den T.R.Zeliang Delhi-i ogo

Kohima, Feb.16 (TYO): Nagaland & Arunachal Pradesh angh, Wb.P.B.Acharya tanü Brehostibar nü ajungbena Chief Minister, T.R.Zeliang anir New Delhi-i ogo.
Tenati Delhi nung oagiji Union Home Minister ajurua tang Nagaland nung timtem ataloka aliba indang jembia telemtetba kar agitsü merangtsü ta angazüker.
“Tang Nagaland nung government mapa meinyaktettsüsa timtem ajuruba ya nübortem longkak aitba mapang nisung asem asüba, government indang kiojen rongdokba aser HSLC & HSSLC tatidang aliba mapang mokdangba aser government office-tem melapokdaktsüba ajanga atalok aser item timtem ajanga government inyakyim ajak ‘paralyse’ kümogo, aser iba jagi nübortem kanga timtemdagi,” ta tanü angh alidak Raj Bhavan nungi Public Relation Officer (PRO) ajanga sangdongba osang ka nung metetdaktsü.
Iba timtem ya ataloker mapang shia tensa tia mejungi akümba indang angh-i center sorkar nem metetdakja aruogo aser paisa Nagaland Tribes Action Committee aser Joint Coordination Committee na prongla dang tashiyim amshia masü saka yimjung nung timi longkak aitba sentongtem agitsü mepishia aruogo ta kasa sangdong nungsa PRO-i metetdaktsü.
Yashi February 15 nü Nagaland Tribes Action Committee nungi nisung 14-i Raj Bhavan nung angh ajuruogo aser chief minister menden nungi February 17 tashi nung alutsüla ta takangba ka angh nem agütsüogo aser angh-i mapang shitak nung teinyaktsü inyaktsü nangzükogo ta PRO-isa ashi.
Shitakba agibo, Brehostibar nikongdang 4:00 ako nungi Kohima nung angh-i yimten telok ajak telongjem senden ka ayongzüka liasü saka ajungbena pa Delhi-i aoba ajanga iba sendenji thitemogo.