Nagaland High Court

India kübok aliba state shia nung pei pei meyong high court kaka alitsübaji kanga nüngdak aser melaa dang lir saka tang tashi Nagaland nungbo melapoktetter. Atangji, Nagaland nung dang masü saka Mizoram o Arunachal Pradesh state na nunga tang tashi high court balaka melapoktetter. Item state ana nung high court melapoktetba timtemji parnoki dang meteta lir saka Nagaland nung melapoktetba timtemjibo high court amenoktsüsa kiojen peria makaba den ano state sorkaria temulung agüja meinyakba ajanga lir. Nübortemi akümba yimten (democracy) ajungba kuli kaji obendangdak aliba inyakyim ya lir. Obendangdak (court) aliba tetezüji ozüng raksartem nem temerenshi agütsütsü aser shitak inyakertem nem temeten agütsütsü. Aji oda, ken o benoka jembidak obendangdakji nübortem atsüokdak aser temeten menguteti alirtem asoshi temeten angudak lir. Ibaji nübortem ajak atema teimla lir. Ajisüaka, kodang obendangdak nungi obendang mapang shitak nung magütsülir, ochi obendang magütsüba den kasa akümer. Tang India nung timtemji ibaji lir. Linük nung ochimashi onsara aser tagitsü rakteper onsara, anungji obendangdaki ken o aika bener arur aser item ken o ji obendangertemi bendangtsür mebendangmar. Iba jagi tanü supreme court aser high court-tem nung ken o angadangtsü mapang magütsütetba agi obendang magütsütet ken o meyirijang aika anendaka lir. Aji oda, ken o aika nisung sür külenang obendang agütsütetter. Nübortem rongnung ochi temeten aginertem asoshi iba tiaji temulung ashitsüka lir. Ano high court state shia balaka alitsübaji tanga state-tem dang nungi Nagaland asoshisa tenüngdaktiba, kechiyong maparen ajak nung India nunger tangartem dang nungi Naga nungertem sobaliba ya kenyongi balaka lir. Ibayongji government service dak aketba mesüra India temzüng ozüng anema inyakba mapa mesüra Naga nunger ken o aika high court aser supreme court nung mebendangtet meyipa yoker. Ibayongji, Nagaland akümdangyongi Naga nunger asoshibo obendangdak balaka alitsü nüngdakba indang jembia liasü. Aji oda, India tatar senden nung latetba temzüng ozüng kechaia  Naga nunger tamangba yimsü, sobaliba, loktiliba aser likalilem dak aketba mapatem malentsü ta India temzüng nung jangjajangjaa lateta lir. Nagaland akümtsü jembirtemi Nagaland nungbo ” Naga Tribubal’ ta ser tematiba obendangdak ka alitsü nüngdakba indang ken o benokba angutsü. Ajisüaka, tanga state nung amato dang high court dang alitsü asoshi latetba agi tanü tashi iba telemtetba kübok Gauhati high court nung dena lir. Tang ya Nagaland asoshi high court nüngdakba indang dang masü saka Naga yimten tebilemtsü ya tatem küma latettsü asoshi jembiba mapang lir. Anungji, asenok asoshibo India union kübok tanga state-tem den liromedema high court balaka alitsü jembiba dang nungibo Nagaland nung Naga nunger asoshi high court masü supreme court nüngdakba ken o jembiang tajungba asütsü akok. Atangji, Nagaland nung state sorkari tebang agi jembiaka high court balaka ayutsüsa temulung agüja meinyakba kulitemji high court balaka lira, sorkari lemtetba telemtetba aika ‘Stay Order’ agütsüba agi mapa küma meinyaktettsü ta bilemer asütsüa akok. Ano, high court lapokra yangji inyaker ajak nem ita sen agütsütsü aser iba senji kong nungi bushia agütsütsü ta shisabolur alitsüa akok. Item ajak asoshi shisabolutsübaji tim dang lir. Ajisüaka, joko state kümer küm 50 dak tali süir asünungji, Nagaland-a state ka ama lasasa nokdaktettsübaji bilemtsüla. Tang tashibo asenok asoshi Delhi nung oa monga kazür India sorkar dang nungi sen tiemba meshizüka bener arubajiang takok tulu amai bilemer, ajisüaka iba tangatetbaji melenshitsü mapang tongogo. Joko, Naga nunger yimsüsürtem Kohima nungi sempettsüpet tapu tapu bener Delhii meshimetsüi aotsüba mapang masü saka Delhii aotsüa mapang mao Nagaland nung rongsen poktetdakja inyaktsüba mapang lir. Iba ama putu tensa ka nung, asenok ken o tangar high court aser supreme court nung benoka yur kümsa küm atatsüsa masü saka mapang meindoki asen meyong obendangdak ochiobendang ngutettsüsa Naga nunger obendangdak salang ka alitsü mapang tongogo.