Nagaland House Delhi-i Naga Food Festival ayonga agi

Manipur Bhavan nung Naga Food Festival nung nisung longsotepba noksa nung angur. Iba sentong ya Manipur Resident Commissioner, Vinit Joshi-i lapokja liasü. Manipur, Nagaland aser Delhi nungi nisung aikati iba Festival nung shilema agidar.

Dimapur, August 27 (TYO): Nagaland House Delhi-i August 26 aser 27 nü Madhya Pradesh Bhawan aser Manipur Bhawan na nung Naga Food Festival ayonga agiogo, aser nisung shia sen 500/- dang liasü, ta Nagaland House, Delhi Resident Commissioner, Abhishek Singh-i sangdong ka nung metetdaktsü.
Iba dak sendakba nung Nagaland House Delhi-i, Nagaland sorkar Horticulture Department-i mozü medeni züsentetba chiyungtsütem, süngjanglijang aser aonsotsü balala yokba atema pelaba metetdaktsü.
“Iba ama mapatong nükjidong ya Delhi nung alirtem dang Nagaland indang chiyungtsü balala metetdaktsütsü asoshi liasü. Tarutsü nunga onoki ano sentong aika ayonga agitsü, aser iba nungji Food Festivals den Nagaland indang kenten aser sobaliba sayatsü,” ta sangdong ajangasa metetdaktsü.
Iba festival ya Ek Bharat Shrestha Bharat kübok ayonga agi, kong Bhawan balalai tangar Bhawan nung chiyungtsü balala renemer agutsür.
Taoba hopta nunga, August 19, 2017 nü Nagaland House Delhi nung Madhya Pradesh indang chiyungtsütem renema liasü. Iba denji kasa September 4, 2017 nü Manipur indang chiyungtsütem Nagaland House Delhi nung renema agütsütsü.