Nagaland-i 15th FC nem Memorandum agütsü

Secretary Finance, Y. Kikheto Sema IAS-i 15th FC Secretary, Arvind Metha nem report agütsüdang agiba noksa angur.

Dimapur, Luroi (August) 17 (Agencies): Fifteenth Finance Commission (15th FC)-i reports aser memorandum jelia agütsütsü ashiba ama Nagaland State Finance Department-i Luroi (August) 16, 2018 nü report agütsüogo.
Finance Secretary, Y. Kikheto Sema, IAS-i aniba telok kati New Delhi nung 15th FC nem report ji agütsü.
Finance Commission-i ashiba onüktem kanga tongtipang kechiyong iba ajanga April 1, 2020 nungi March 31, 2025 tashi Nagaland state indang senotsü tia lemtettsü.
State Finance Commission-i 15th FC Secretary, Arvind Mehta nem ‘Statements Relating to State Finance,’ ‘Topic Notes Relating to State Finances,’ ‘Schedules & Notes Relating to Local Bodies’ indang report den State Memorandum ka agütsü.
Taoba ita ishika State Finance Department-i kanga dang meranga report renem aser mapang shitak nung report agütsüba atema Arvind Mehta-i pelaba metetdaktsü.
Paisa nüngdak dang süra supplementary memorandum agizüktsü ta ashi.
Taküm November ita tatemlen 15th Finance Commission-i Nagaland semdangtsü sentong lir aser iba mapang State Finance Department-ia supplementary memorandum ka agütsütsü akok.
Report agütsüba Kikheto den Deputy Secretary (Budget) Finance Department, K. Metha liasü.