Nagaland-i bener aoba azü 22 apu

Guwahati, July 2 (Agencies): Ozüng alema Nagaland-i bener aoba azü 22 shi ka Hombarnü Assam kübok Golaghat district nung apu.
Azü 10 tashi sür lia angu aser parnok komaser asü’ar kuli metettsü atema veterinary doctor temi temang rangsa reprangdangogo, ta Golaghat, Additional superintendent of Police, Surjit Singh Paneswar-i ashi.
Tanüngba azü 12 ji district veterinary department ketdangsertemi anepaludar, ta paisa ashi.
Azütemji Dergaon nungi Nagaland-i bener aodang apu ta onoki asüngdangya asüdang osang angazükogo.
Indian Penal Code (IPC) aser Prevention of Cruelty to Animals Act, 1960 kübok police-i FIR ka benokogo.
Hombar nikongtsütsü 1:00 ako meta Borpathar nung azü abenba gari jagi labor ka dak atsük. Idangji iba tesem nung alirtemi truck gari telung reprangdang azütemji alener bena aliba angu.
Iba mini-truck anir ket nung Assam mesüra Nagaland nungi azü ayoktsüba licence maliasü. Assam aser Nagaland nung ozüng alema shishilembartemi Upper Assam district tem nungi azütem putener bener aoba liasü südi, ta ketdangser kati ashi.
Police-i iba gari den driver pua lir aser bushisüngdang südar.