Nagaland-i coronavirus atema teinyaktsü ajak inyakdar

Dimapur, March 6 (TYO): Nagaland sorkari coronavirus khuret nungi jenbutsü atema mapa ajak inyakdar, ta Chief secretary Temjen Toy-i ashi.
March 6, 2020 nü Chief Secretary-i District Commissioner ajak aser Commissioner Nagaland den video conference ka agia liasü.
Iba mapang pai ketdangsertem dang COVID-19 putetra, ibaji azüoktsü atema teinyaktsü ajak renema alitsü ashi.
Temjen Toy-isa district ajak dang deputy commissioner lenisüba kübok district task force tentettsü tetuyuba agütsü.
Deputy commissioner temi chief medical officer aser sendaktepa alirtem den külemi amalitepa mapa inyaktsüla. Sendaktepa alirtem rongnung school education department aser District Disaster Management Authority dena lir, ta paisa shisem.
Olulutem meprokshitsü atema Directorate of Health and Family Welfare-i official twitter handle nung COVID-19 indang osangtem metetdaktsütsüla. Olulu aser taila osang prokshirtem ozüng tapet agi merenshitsü, ta Chief Secretary-isa ashi.
H&FW Department-i N-95 masks aser units ajak nem thermal scanner agütsütsü atema mapa inyaktsüla. Ajisüaka, foreign tourists menokdangtsü kechiyong department-i parnok jungjunga reprangtsü, ta chiefTemjen Toy-i metetdaktsü.
Video conference mapang School education department Principal secretary, Menukhol John-ia deputy commissioner ajak dang pei pei district nung sorkari coronavirus indang sangdong agütsüba ajak metetdaktsütsü nenshia ashi.
Kohima aser Dimapur nung ‘quarantine locations’ shimteta lir aser virus aketba nisungtem ayutsü atema yipden 50 renema lir, ta Health and family welfare department Principal director, Dr Vizolie Suokhrie-ia metetdaktsü.
District shiai iba virus dak sendakba mapa inyaktsü renema lir aser tanga district tem nunga quarantine tesemtem shimtsü. Yimtsüng nung alirtemia yimra mesükba agi shirangba osang ketdangsertem nem sangoktsütsü metetdaktsür, ta Dr Vizolie-isa ashi.
Iba mapang Dimapur deputy commissioner Anoop Khinchi-i Dimapur airport nung thermal scanners talila ayutsü atema ashi.
Passenger ajak scan mesüteter aser tang atema coronavirus agi kongshia aliba linük 12 nungi arurtem dang scan asür, ta Dimapur deputy commissioner-isa metetdaktsü.
Dimapur railway station nunga item linük 12 nungi arurtem thermal scanning asütsü indang osang sangoktsütsü ta paisa shisem.
Iba video conference nung Department of Health and Family Welfare-isa virus dak sendakba mapa balala inyakba insang presentation ka sayu.