Nagaland-i Dr. Abdul Kalam mang ayimer

Taoba India Tir Dr. A.P.J Abdul Kalam nem akhümtsübu agütsütsü atema Nagaland Chief minister, T.R. Zeliang Delhi-i oa asür süngden nung naro yuja tetushi agütsüba angur. Roads & Bridges Minister, Y. Vikheho Swu, aser Principal Secretary to CM, Temjen Toy nati T.R. Zeliang meina Delhi-i ao. (New Delhi, July 28)

Kohima, July 28 (TYO) : Nagaland Angh aser Chief Minister nati taoba tir A P J Abdul Kalam asüba atema mang ayimba osang metetdaktsüogo.
Kalam-i science tsütsü aika shia metetba dang masü saka pa taküm libaliro nunga khenyongi balaka liasü. Pai scientist, educationist aser kaket zülur ka ama linük asoshi inyaktsüba mapa ka danga mesamatsü aser teti bilemtettsü, ta Angh P B Acharya-i ashi.
Pa alima nungi pila aobaji India atema dang masü saka alima ajunga atema takoksa lir. Kalam nem akhümtsübu agütsütsü atema asenoki tashitait, azükaru aser yimjung aliba India kümdaktsütsü merangdi, ta Nagaland Angh-isa metetdaktsü.
Chief Minister, T R Zeliang-ia sangdong ka nung, ‘Missile Man of India’ ta dang masü saka ‘Peoples’ President’ ta ajar takotet nisung ka asüba atema sasar aser mangyim jashi lemsateper ta metetdaktsüogo.
Kalam-i linük atema inyakba mapatem teti bilemtettsü, ta paisa ashi.