Kohima, February 14 (TYO) : Yashi, Honibarnü Department of Science & Technology, Vigyan Prasar-i ayonga akaba 6buba National Science Film Festival nung institution telemsa nung yangluba ‘Nagaland is changing. But…’, film ajanga Golden Beaver Best Film Award nguogo.
Kasa film ajanga best sound design atema technical excellence award dena angu. Best Film Award atema senpet sen lakh ka aser technical excellence award atema senpet asen 20,000 angu.
Item award tem ya Mumbai nung film yanglur MS Sathyu ket nungi Gurmeet Sapal-i agizüka liasü.
Gurmeet Sapal-i direct asüba film ya Nagaland State Forest Department-i produce asüba lir aser technical tsütsü TERI, New Delhi den lokteper yanglu.
2015 küm poduce asüba film ya Sendenyu yim, Kohima district aser Sukhai yim, Zunheboto district tem nung aliba nüburtem pei litsü wazüka ayuba indang ostü lir.
Tanü ya Sendenyu aser Sukhai yimtsüngtem nung aliba nüburtemi pei litsü wazüka ayuba tsütsü meranga inyakba den Nagaland Forest Department-i state litsü wazüka ayutsü atema meranga inyakba atema pelatepa amungba anogo ka lir.
Iba film ajanga award ana anguba tepela lemsatepba mapang PCCF & HoFF Nagaland, M Lokeswara Rao-i, shitakba takok angurtemjibo alemli nungi Nagaland litsü wazüka ayuba tsütsü meranga inyaker lokti balala tem lir, ta ashi.
Pai, Mumbai nung 6buba National Science Film Festival sentong nung iba film sayuba ajanga alima rangbeni Naga nunger lokti ajaki ‘carbon pool’ kanga talubusa aliba pei litsütem wazüka ayutsü asoshi bendanga agüja inyakba metetogo. Naga nunger lokti ajaki tzü mopung melenshiba ajema kümdaktsütsü asoshi item alitem wazüka ayur, ta ashi.
India sorkar aser International tentet balalai item telok nungita yaritsü nüngdaker, ta Rao-i shisem.

You must be logged in to post a comment Login