Nagaland-i novel Corona virus atema renema lir: Neiphiu Rio

Kohima, March 28 (TYO): Nagaland nung tetsükdaktsütem liaka, sorkari novel Corona virus tebilemtsü atema inyaktsü renema lir ta Chief Minister Neiphiu Rio-i tanü ashi.
Anogo 21 linük shibangtsü tenzüker anogo pezübuba nung Rio-i ashiba agi, “tang ya alimai mapang tamajung ka ajurua lir aser iba ya asenok taküm alidang majurudangba tensa ka lir. Iba khuret ya asenok ajaki meteter.”
“COVID- 19 wara atema state sorkari nübortem kümzüka ayuba den tashidak anema tongti süa inyakba healthcare map inyakertem, police, media aser tangartem atema bilemtsür. Public aser medical mapa inyakertem atema mozü, osettsüset aser tanga maparen ajak renema lir” ta paisa ashi.
Sorkarisa medical safety gears, ventilators aser tang rongdak nüngdakbatem bener arutsü atema inyaktepdar, ta Rio-isa shisem.
Honibar nikongtsütsü 4:00 ako tashi nung tangalen nungi Nagaland-i meyipa arur nisung 3,076-i District Surveillance Team tem nem osang agütsüogo aser parnok tang ‘home quarantine’ nung lir, ta Chief Minister-i ashi.
“Tang tashi nung sample 18 tendangtsü atema bener yokogo aser iba nungi 13 bo negative ta osang nguogo aser sample 5 indang osang ang mangu lir”, ta paisa ashi.
COVID-19 atema nüngdakba medical equipments mali ta nisungtemi tsübutepa bilemba atema Rio-i “Nagaland nung ventilators 16, Personal Protective Equipment (PPE) 1712, N95 Masks 551, aser cardiac monitors 16 lir aser itemji district balala nem lema agütsüogo” ta jangjatsü.
Tanü medical equipment 1536 tashi tongogo aser iba nung Triple Layer Mask, PPE, BD Universal Viral Transport aser swab sticks dena lir, ta paisa shisem.
“Maneni, Hombar tashi nung medical equipment aser accessories 2,16,800 tashi atongtsü imlar. Taruba hopta tsüngda ventilators talila 33 tonga arutsü imlar” ta Rio-i metetdaktsü.
State Health Department-i COVID-19 atema isolation yipden 173 renema lir aser ibaji COVID-19 Hospitals nung isolation yipden 175 aliba den talila bendenlokba lir, ta paisa ashi.
Tang linük ajunga shibangba ajanga tongtipang osettsüset aser jangotsü bener aruba menokdanger. Petrol, Oil & Lubricants (POL) dena tongtipang nüngdakba ajak timi dang bener arudar, ta Nagaland Chief Minister-isa metetdaktsü.
Rio-isa Union Home Minister aser state balala nung Chief Minister tem dang parnok state nung anendaka aliba Naga nungertem yaritsü atema mepishia metetdaktsü.
“State sorkar ketdangsertemi iba tebilemtsü atema anibelem arema inyaktepdar. Ni bangdak ketdangsertem, Deputy Commissioner tem aser tanga district ketdangsertem den anogoshia video conferencing ajanga osang metetpelateper” ta paisa ashi.
“Iba alima wara anema inyakba nung nisungtemi yaritepba atema kanga pelar. Nisungtemi quarantine aser isolation wards lapokba nung yariteper, safety gears yangluba nung aser tenla agütsür, nüngdakbapur nem chiyungtsü agütsür. Item mapa tajung pelashishia agizüker” ta Rio-isa ashi.