Nagaland-i rural tourism communitise asür: C. Apok

Kohima, September 26 (TYO): Centre ajanga teyari agütsüba scheme – ‘Swadesh Darshan’ aser ‘PRASAD Schemes’ ajanga Nagaland sorkari rural tourism communitise asütsü meranger.

Nagaland aser North East nung rural tourism jenjang ajungketttsü atema takoktsü lenmang aika lir aser iba jagi State sorkari Tourism Department ajanga meta talangka pila aliba tesemtem nung central programmes inyaka osang prokshitsü meranger, ta Tourism Parliamentary Secretary, C. Apok Jamir-i osangbener dang ashi.

Hombarnü Tourism Department indang Logo competition sentong nung C. Apok-i osangbener den sensaksemdang iba osang metetdaktsü.

Swadesh Darshan ya ‘Theme Based Tourist Circuits’ atema Integrated Development aser külen PRASAD ya ‘Pilgrimage Rejuvenation andSpiritual Augmentation Drive’ indang National Mission lir.

“North East tesem aser talisa Nagaland ya alima nung tourist temi sapua semdangba tesem kümdaktsütsü nükjidong nung onoki iba mission inyaker. Tangari Nagaland kübok district 11 nung Naga nunger sobaliba aser libaliro ajangshidaktsütsü atema Department-i iba mapa inyaker” ta Apok-isa ashi.

Tourism dak sendakba maparen inyakba ajanga mapa adoktsü aser ibaji Nagaland nung zünger mapa mongui aliba lanurtem atema tajangzük asütsü, ta paisa shisem.

1. Apok-isa Tourism department indang logo melentsüba indang olen ka jembidang, tang tashi nung linük kübok tesem balala nungi logo 96 arua lir aser item rongnungi 50 shimteta lir, ta ashi.

Department-i shimteta aliba logo 50 nungi tajungtiba ka shimtettsü aser ano tajungtiba logo 10 nema sempettem agütsütsü. Asüng, Tourism Directorate, Kohima nung World Tourism Day sentong nung takokertem indang osang metetdaktsütsü, ta C. Apok-isa metetdaktsü.

HORNBILL FESTIVAL

Tourism Parliamentary Secretary-isa taküm Hornbill Festival anogo 10 nü amungtsü ta metetdaktsü.

Yaküm Chief Minister TR Zeliang-i Hornbill Festival anogo tajemba amung nung ajungtsü ta tebilemba shidanga lir, anungji iba ya taruba senden nung benoka jembitsü, ta paisa shisem.