Nagaland-i sports policy tasen ka yanglutsü

Dimapur, Mongputeni (October) 14 (Agencies): Nagaland state sorkari kobi melii sports policy ka yanglutsü aser iba ajanga saisapong balala nung asayartem jangjatsü aser ajungkettsü ta chief minister Neiphiu Rio-i ashi.
Sports policy tasen ajanga Nagaland nungi asayartemi national aser international jenjang nung asayartem den tokteptettsü ta Rio-isa ashi aser pai iba atema Centre dang nungi teyari meshi.
Nagaland Badminton Association-i Dimapur District Badminton Association indoor stadium nung NE-Zone Inter-State Badminton Championship tembangba sentong nung jembidang Neiphiu Rio-i iba osang metetdaktsü.
Iba asayamung nung chief host ji chief minister Rio liasü aser pai ashiba agi, “Northeast nung state tejenba Assam sülenbo Nagaland lir saka Nagaland Olympic Association- 2004 nungang Indian Olympic Association nung züngsem kümtet.”
1948 Olympics nung India asoshi mezüngbuba football captain ji Naga nunger Dr T Ao liasü saka Nagaland state ngur küm 41 sülen ang IOA nung züngsem aküm, ta paisa shisem.
February 2007 nung Nagaland-i 33 buba National Games nung shilem agidang medal 11 ngutet. Guwahati nung ayonga amungba asayamung nung gold ka dena medal temji angu ajisüaka lia arudang saisapongbaren nung Nagaland state jenjang tamajungba kümyonga arur, ta Rio-i sasa bilema jembi.
“North east nung sempet aketba lanur aika lir saka infrastructure aser training facilities aliba ajanga lanurtem indang sempet mamshiteter,” ta paisa shisem.
“Saisapong ajanga nisungtem longjemdaktsür anungji asenok kati ka dang nungi angazüka aser yaritepa tenüng tajung angutsü merangtsüla. Asenoki Nagaland, Northeast aser India atema konang bentsür arutsüla” ta Nagaland chief minister-isa ayongzük.